Prezidente Parlamentu Nasional, Aniceto Longuinhos Guterres Lopes. Imajen Tatoli/Antonio Goncalves.

DILI, 10 juñu 2022 (TATOLI)—Prezidente Parlamentu Nasionál, Aniceto Longuinhos Guterres Lopes, hateten Parlamentu Nasionál (PN) iha sesaun lejizlativa dahaat, iha lejizlatura dalimak ne’e nia dezempeñu ka produtividade di’ak tebes tanba aprova lei importante ne’ebé ho estruturante balun ka lubuk ida.

Notísia Relevante: 14 jullu, PN inisia konvida PM Taur ko’alia balansu Governasaun

“Iha lejizlatura dalimak ne’e, Parlamentu Nasionál nia dezempeñu ka produtividade di’ak tebes tanba aprova lei importante ne’ebé ho estruturante lubuk ida. PN nia knar hanesan lejisladór atu halo lei, fiskaliza asaun Governu, no hanesan órgaun ne’ebé funsiona hanesan desizaun polítika,” Prezidente PN, Aniceto Guterres, hateten ba Agência Tatoli liuhosi entrevista eksluzivu iha nia knar fatin PN, kuarta (08/06) ne’e.

Tuir Konstituisaun Repúblika Demokrátika Timor-Leste (KRDTL), artigu 92 (Definisaun) Parlamentu Nasionál mak órgaun soberania Repúblika Timór-Leste nian ne’ebé reprezenta ema timór-oan tomak, iha kbiit atu halo lei, atu fiskaliza no atu halo desizaun polítika.

Aleinde iha KRDTL artigu 95 (Kompeténsia Parlamentu Nasionál nian) ne’ebé define kompeténsia sira PN nian. Iha artigu ne’e, alenea 1 hateten kompete ba Parlamentu Nasionál halo lei kona-ba asuntu báziku sira polítika interna ho externa nasaun nian.

Alinea 2 haktuir, Parlamentu Nasionál de’it mak halo lejizlasaun kona-ba hanesan; a) Rai-ketan RDTL nian tuir artigu númeru 4; b) Limite bee tasi laran Timor nian no mós zona ekonómiku eskluziva ho tan direitu Timór-Leste nian ba zona tatutan no plataforma kontinentál; c) Símbolu nasionál sira tuir númeru 2 artigu 14; d) Sidadaun; e) Direitu, liberdade no garantia sira; f) Estadu no kapasidade ema nian, direitu família nian no mós jerasaun ne’ebé sei mai, g) Fafahek territoriál;

h) Lei eleisaun nian no mós rejime referendu nian; i) partidu no mós asosiasaun polítika sira; j) Deputadu sira nia estatutu; k) Titulár sira-nia estatutu iha Estadu nia organizasaun; l) Baze sistema hanorin nian; m) Baze sistema seguransa sosiál no mós saúde nian; n) Suspensaun garantia konstitusionál nian no mós deklarasaun Estadu serku ho tan Estadu emerjénsia nian; o) Defeza no seguransa nia regra; p) Regra fiskál no q) Rejime orsamentu nian.

Iha alinea 3 hateten, Parlamentu Nasionál sei halo mós hanesan iha a) Ratifika nomeasaun Prezidente Tribunál Supremu Justisa ninian no mós eleisaun Prezidente Tribunál Superiór Administrativu Fiskál no Kontas nian; b) Delibera kona-ba relatóriu knar Governu nian; c) Hili membru ida ba Konsellu Superiór Majistratura Judisiál nian no mós ba Konsellu Superiór Ministériu Públiku nian; d) Delibera kona-ba Planu no Orsamentu Estadu nian no mós relatóriu kona-ba orsamentu ne’e; e) Fiskaliza oinsá Estadu hala’o orsamentu nasionál;

f) Aprova no mós fó-sai akordu no ratifika tratadu no konvensaun internasionál sira; g) Fó amnfstia; h) Fó autorizasaun ba Prezidente Republika atu hala’o vizita Estadu nian; i) Aprova revizaun ba lei inan hosi maioria baluk tolu rua (2/3) Deputadu sira; j) Autoriza no konfirma deklarasaun ba Estadu serku no Estadu emerjénsia nian; no k) Halo proposta ba Prezidente Repúblika atu halo referendu kona-ba asuntu sira-ne’ebé iha interrese nasionál.

Ikus liu, iha alínea 4 haktuir Parlamentu Nationál sei halo mós hanesan, a) Foti nia Prezidente no menbru sira seluk ba Meza; b) Foti menbru na’in-lima ba Konsellu Estadu; c) Elabora no aprova nia rejimentu; d) Forma komisaun permanente ida no harii komisaun parlamentár seluk-seluk.

Aniceto Guterres hateten durante lejislatura dalimak ne’e deputadu sira iha PN hala’o nia knar hodi halo aprovasaun ba projetu-lei no proposta-lei lubuk ida.

“Ita ko’alia kona-ba dezempeñu lejizlatura tomak ne’e tinan lima, kada lejislatura fahe ba sesaun lejislativa ne’e tuir funsionamentu normál ba Parlamentu Nasionál nian no kada sesaun lejislativa nia períodu hahú hosi 15 setembru to’o 14 jullu tinan tuir mai. Entaun ita ko’alia kona-ba dezempeñu PN nian ita haree hosi kada sesaun lejizlativu ka lejizlatura, no agora ita-nia situasaun PN agora labele ko’alia dezempeñu lejislatura tomak nian. Tanba lejizlatura ida-ne’e hahú iha tinan 2018 hau foin asume efeitu fali hanesan Prezidente PN iha 20 maiu 2020. Entaun hosi ne’eba, ita bele dehan parte ki’ik-oan hosi terseira sesaun lejislativa to’o agora ha’u foin asume to’o agora atu termina ona kuarta sesaun lejizlativa iha 14 jullu,” nia dehan.

Entaun, se ko’alia kona-ba dezempeñu hosi PN nian hahú hosi 20 maiu 2020 mai to’o ohin loron.

“Se sura hosi 20 maiu 2022 mai to’o ohin loron, até hau bele dehan katak atu halo lejizlatura agora PN nia knar hanesan lejisladór, órgaun desizaun polítika nia produtividade barak liu entermu kuantidade ne’ebé laiha dúvida produtivu liu,” Aniceto Guterres hateten.

Lei importamte sira-ne’ebé deputadu sira iha Parlamentu Nasionál aprova iha lejislatura dalimak no hetan pormulgasaun hosi Prezidente Repúblika, Francisco Guterres ‘Lú Olo’.

Nia dehan, iha lei inisiativa balun ne’ebé tinan 15 iha PN la konsege rezolve no bainhira nia-parte hahú asume knar hanesan Prezidente Parlamentu Nasionál iha 2020 ne’e, konsege prodús no aprova lei importante lubuk ida.

Hanesan lei estruturamente sira-ne’ebé iha lejizlatura dalima to’o dadaun produs aprova hetan promulgasaun hosi Prezidente Repúblika no públika ona iha jornál repúblika mak hanesan lei númeru. 7/2020, 26 agostu, kona-ba Lei Medida Prevensaun Antí Korrupsaun (MPKK).

“Lei MPKK agora tama ona faze implementasaun no lei ida-ne’e rekezita mós rejistu deklarasaun de bens hosi servidór Estadu sira ba kargu importante no mós polítiku sira, juís, prokuradór,” nia hateten.

Maibé lei MPKK ne’e sei presiza tan lei komplementár barak, nune’e PN servisu hamutuk ho Tribunál, Prokuradória Jerál Repúblika, Komisaun Antí Korrupsaun (CAC, siglá portugés) tenta hela atu komplementa.

Aleinde ne’e, durante ninia mandatu nu’udar Prezidente Parlamentu Nasionál ne’e konsege mós aprova lei númeru 12/2021, 30 juñu, kona-ba lei Kódigu Mineiru.

“Lei ida-ne’ebé ita durante ne’e hein kle’ur maibé lejizlatura agora foin aprova ona tanba ita-nia ekonomia depende totál reseita hosi fundu mina-rai, enkuantu rikusoin balun seidauk book. Nune’e Lei ida Kódigu Mineiru foin aprova iha 2021 agora faze implementasaun ne’ebé fó dalan hodi explora rikusoin mina-rai iha rai laran barak atu ita explora,” nia dehan.

Notísia Relevante: Kaleidoskópiu 2021: PN aprova OJE 2022-altera pakote lei eleitorál tolu

Aliénde lei númeru 23 /2021 10 novembru-kona-ba Lei Podér Lokál no Dezentralizasaun Administrativa, Lei númeru 22 /2021, 04 novembru, lei Eleitorál Munisipál.

Nia dehan, lei pakote tulu ne’e ne’ebé desde segundu lejislatura tau iha PN hafoin haruka ba Prezidente Repúblika veta mai lejiztura agora konsege aprova no atu implementa mak presiza tan presiza Lei Finansiamentu Lokál nian no sira seluk.

Parlamentu Nasionál mós aporva lei númeru 12/2020, 02 dezembru, kona-ba Lei Protesaun Sivíl.

Iha reforma setór justisa nian aprova mós hanesan Lei númeru 25 /2021, 2 dezembru, kona-ba lei Organizasaun Judisiáriu, Lei Estatutu Majistradu Judisiál, Estatutu Ministériu Públiku, no Lei kona-ba Assosiasaun Rejime Jurídiku ba Asosiasaun Públika Profisional.

Tuir Aniceto, desde indepedénsia ho tempu kle’ur órganizasaun profisionál sira agora barak loos maibé seidauk iha lei baze ida kona-ba oinsá sidadaun sira liu-liu profisionál sira iha área hotu-hotu atu harii asosiasaun profisionál, nune’e ho aprovasaun lei Rejime Jurídiku ba Asosiasaun Públika ne’e iha tiha ona hodi regula.

PN aprova mós Lei Enkuadramentu Orsamentál Jestaun Finanseiru Públika ne’ebé agora halo Governu konpletamente ko’alia kona-ba OJE ho sistema orsamentu por programa, ne’ebé PN kolabora ho Governu ba reforma sistema jestaun finanseira refere.

Lei Númeru 24 /2021, 19 novembru, prosede primeiru alterasaun lei númeru 10/ 2004, 24 novembru, Lei Sistema Saúde no aprova medida esesionál no temporária vijilánsia sanitária resposta pandemia COVID-19.

Alterasaun dahuluk Lei Sistema Saúde tanba aproveita ho situasaun pandemia COVID-19 ne’ebé fó dalan ba Governu hola medida espesiál iha situasaun ruma bainhira laiha Estadu Emerjénsia.
Tanba ne’e, Prezidente Parlamentu Nasionál dezempeñu protuvidade lejizlatura dalimak hodi aprova ona lei hirak refere ne’ebé ho estruturante no importante tebes.

“Hosi tinan 2020 to’o 2021 tomak, kuaze prodús lei estruturante importante loos konsege aprova lubuk ida,” nia dehan.

Enkuantu, aprova Lei Nú. 10/2020 Lei Orsamentu Jerál Estadu (OJE) 2020, Lei OJE 2021 no aprovasaun medida apoiu sosíu-ekonómiku, Lei OJE 2022 no foin lalais aprova lei Orsamentu Retifikativu ba 2022 ninian iha lei orsamentu ba kriasaun fundu ba kombatente libertasaun nasionál.

Nune’e mós, nia dehan, Parlamentu Nasionál mós hala’o alterasaun ba lei lubuk ida hanesan Lei númeru 19/2021, 8 setembru primeiru alterasaun lei númeru 6/2016, 25 maiu, Lei Resensiamentu Eleitorál, lei númeru 16 /2021, 28 jullu, terseiru alterasaun lei númeru 5/2006, 28 dezembru- Lei Órgaun Administrasaun Eleitorál.

PN aprova lei númeru 15 /2021, 14 jullu, sesta alterasaun lei númeru 7/2006, 28 dezembru- kona-ba Lei Eleitorál ba Prezidente Repúblika, Lei númeru 14 /2021, 7 jullu, segundu alterasaun lei númeru 11/2009, 07 outubru, kona-ba ei Divizaun Administrativu no Territóriu.

Alterasaun dahukuk Lei Migrasaun no Asilo, lei númeru 11/2021, 23 juñu- prosede primeiru alterasaun lei númeru 3/ 2010, 21 abríl, kona-ba Lei Sistema Defeza Nasionál, Lei númeru  6/2021, 31 marsu, aprova Rejime Jurídiku Arbitrajen Voluntária no prosede primeiru alterasaun iha Kódigu Sivíl no autorizasaun renovasaun Estadu emerjénsia ba bada-17.

Durante ninia mandate iha lejislatura dalimak ne’e, deputadu sira iha Parlamentu Nasionál  hala’o sira-nia knar fiskalizasaun ba atividade Governu nian.

Iha área fiskalizasaun barak ne’ebé deputadu sira hala’o, reuniaun plenária, audiénsia konvida Ministru sira iha área tutela hodi hato’o implementasaun programa, polítika, no atividade sira hodi hatán pergunta sira hosi Deputadu tuir mekanizmu rejimentu parlamentár.

Oinsá kompeténsia PN nian fiskaliza lei sira prodús ka aprova iha ninia implementasaun, Prezidente PN ne’e hatán, Parlamentu Nasionál nia kompeténsia id amak atu halo kuadru legal kona-ba lei.

“Implementasaun lei ne’e kompete ba Governu. Purtantu PN akompaña soke ita-nia fiskalizasaun depende hatene iha problema entaun problema mak bainhira hetan se kuadru legál ruma la kompletu lei ne’ebé ita ko’alia kona-ba lei komplementár ka kuadru legál hanesan dekretu-lei, dekretu Governu no seluk tan. Agora PN nia kompeténsia mak atu halo kuadru legál liliu kona-ba lei,” nia esplika.

Maibé dalaruma problema auzénsia kuadru legál ne’e loloos lei iha ona maibé nia komplementár sira mak seidauk iha ne’e kompeténsia Governu nian.

Prátika loloos implementasaun lei la’ós ona PN nian maibé Tribunál mós envolve ona tanba sira mak implementa loloos liu-liu iha interpretasaun.

“Tanba ne’e fiskalizasaun ne’e mais polítika, barak liu ba asaun Governu duke akompaña implementa lei sira-ne’e tanba implementasaun loos mak Tribunál ho Governu,” nia dehan.

Notísia Relevante: Kaleidoskópiu 2021: PN kontinua suspende proposta alterasaun lei pensaun vitalísia

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan