Espoza eis Prezidente Repúblika, Cidália Nobre Lopes Mouzinho Guterres, muda tali xapeo hosi estudante pre-eskolár Santa Teresinha Bedois, Dili, iha serimónia graduasaun. Imajen/Espesiál.

DILI, 10 juñu 2022 (TATOLI)—Prezidente Instituto para a Defesa Direito da Crianças (INDDICA), Dinorah Granadeiro, informa tuir dadus hosi INDDICA servisu hamutuk ho UNICEF relata katak labarik timor-oan ho idade 3 to’o 5 ho 75% seidauk asesu ba edukasaun liu-liu asesu ba ensinu pre-eskolar.

Notísia Relevante: Labarik 48% sei iha liña probeza nia-laran

Nia hatutan, labarik sira labele asesu eskola pre-eskolár tanba dala ruma iha suku barak iha territóriu laran balun seidauk iha eskola pre-eskolar, nune’e labarik sira labele asesu ba eskola.

“Entaun, inan-aman sira tenke lori fali sira-nia oan ba iha suku seluk, ida-ne’e mos prejudika sira tanba iha eskola balun ho distánsia ne’ebé mak dook. Tanba ne’e mak iha dadus ne’e hatudu katak, labarik Timoroan ho pursentu 75% la asesu ba iha Ensino Pre-Eskolar,” Prezidente INDDICA, Dinorah Granadeiro hateten, ba jornalista sira, hafoin halo diseminasaun análiza situasaun feto no labarik feto iha TL, iha salaun City8, Has Laran, Dili, sesta ne’e.

Razaun labarik 75% la Asesu ba Ensinu Pre-eskola, nia dehan, tanba fizikamente eskola balun mós laiha kondisaun no inan-aman sira seidauk tau importánsia ba eskola infansia.

“Ida fali mós husi dadus ne’e hatudu katak, ita-nia família no inan-aman sira seidauk tau importánsia ba eskola infansia. Sira hanoin katak labarik ho idade 3 ate 5 husik halimar lai iha uma ba to’o idade 6 mak lori ba hatama iha eskola,” nia dehan.

Nune’e, tuir nia, dala barak fatór ida mak inan-aman sira seidauk iha konsiénsia bo kuñesimentu kona-ba importánsia eskola infansia ba labarik sira.

Jornalista  : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here