Diretór Jerál AA/Alfándega, José António Fátima Abílio. Imajen Tatoli/Jogerjo Guterres

DILI, 09 juñu 2022 (TATOLI)— Governu liuhosi Konsellu Ministru (KM) sei hala’o diskusaun no aprovasaun ba proposta revizaun Dekretu-Lei númeru 30/2011, 27 jullu, kona-ba kondisaun no prosedimentu sira hodi observa relativamente importasaun veíkulu sira.

“Ita hato’o ona proposta alterasaun ka revizaun ba Dekretu Lei númeru 30/2011, nune’e Konsellu Minsitru ajenda ona atu debate iha semana oin,” Diretór Jerál Autoridade Aduaneira (AA) Alfándega , José António Fátima Abílio, informa ba Agência TATOLI iha nia kna’ar fatin,kinta ne’e.

Tanba, bazeia ba Dekretu-Lei númeru 8/2016, 8 jullu kona-ba lei fó protesaun ba konsumidór, ne’ebé fó kompetésia ba Autoridade Aduneiru-Alfándega no instituisaun seluk halo kontrola veíkulu importandu sira hosi nasaun seluk.

Tanba Lei-Inan Repúblika Demokrátika Timor-Leste iha ninia artigu 53.º hakerek kona-ba direitu konsumidór sira-nian, maka hanesan, bein no servisu ne’ebé uza ho kualidade, hetan dalan ba  informasaun loloos, proteje saúde, seguransa no ba ninia interese ekonómiku nomós hadi’a danu sira.

Númeru  Estraordináriu iha diploma legál oioin ne’ebé estabelese norma espesífika ho nia objetivu atu    asegura protesaun ba pozisaun konsumidór, presiza ho urjente, aprovasaun lei ida, ne’ebé estabelese enkuadramentu ba refrénsia hodi fó protesaun no defende direitu konsumidór sira- nian.

Diploma ida-ne’e ho nia objetivu, hosi sorin ida, defende konsumidór sira iha relasaun  konsumu nian no hosi sorin seluk, promove avansu kualitativu ida iha setór emprezariál nasionál.

Nune’e, AA Alfándega haree katak Dekretu-Lei númeru 30/2011, iha lacuna tanba laiha artigu ida ne’ebé define detallu  kona-ba karreta nia pesa aat no sokata proíbe tama Timor-Leste.

“Ami propoin maka atu karreta sira ne’ebé maka hetan asidente ne’ebé nia vidru nakfera, maski karreta body sei di’ak ida ne’e sei labele tama  mai tan inklui karreta segunda mão (karreta uza),” Diretór Jerál ne’e afirma.

 Veíkulu sira importa mai tenke operasionál signifika nia mai hatun iha portu tenke halo moris no la’o mesak, labele mai tiha iha portu mak veíkulu halo moris ladiak no tula fali ho kontentór.

“Ami propoin halo revizaun Dekretu-Lei ne’e halo asaun no medida prevensaun inklui halo apreensaun ba veíkulu importasaun hanesan ne’e para Timór labele sai fali nasaun lixu,” nia afirma.

Bianhira, nia dehan, governu hala’o aprovasaun ba revizaun Dekretu-Lei ne’e, AA/Alfándega ho instituisaun relevante sira sei kontrola sériu ba veíkulu sukata no segunda mão tama mai iha país ne’e.

MTK konkorda halo revizaun

Entretantu, Ministru Transporte no Komunikasaun (MTK), José Agustinho da Silva, konkorda ho hanoin Autoridade Aduaneira (AA)/Alfándega atu revizaun Lei númeru 30/2011 kona-ba kondisaun no prosedimentu atu observa relativamente importasaun veíkulu.

Governante konsidera Alfándega nia hanoin di’ak, tanba situasaun muda tuir tempu hanesan situasaun tinan-10 liubá la hanesan ho agora, karik la relevante ona ho situasaun atuál bele revee lei ne’e ho intensaun ba interese Estadu no hasa’e reseita ba kofre Estadu.

“Nu’udar ema polítiku, servidór Estadu no ezekutór ba Orsamentu Jerál Estadu (OJE), prontu serbisu hamutuk ho entidade sé de’it atu asegura interrese Estadu.  Tanba ne’e, bainhira iha mudansa ba lei ne’ebé iha ho intensaun fasilita entidade hotu atubele rekolla reseita ba kofre Estadu, ita tenki apoia no proteje ho regra, tanba asaun hotu tenki la’o iha korridór nia laran,” nia akresenta.

Tanba ne’e, Ministru afirma vontade tomak fó apoia ba mudansa hotu ne’ebé mak iha tanba lei eziste atu fasilita prosesu.

“Lei ne’ebé ninia karater impede fali prosesu tenki muda, entaun kualker mudansa ne’ebé mak iha importante liu maka defende interese Estadu,” nia tenik.  

Iha biban ketak, Sekretáriu Estadu Ambiente, Demétrio do Amaral de Carvalho, husu ba instituisaun relevante atu aplika prosedimentu rigór ba importasaun karreta no motór, nune’e labele fó risku ba meiu ambiente.

“Ita hatene karreta ne’ebé agora fa’an iha ita-nia rai hanesan loos fa’an rebusadu iha merkadu, tanba ne’e husu ba parte relevante tenki hasa’e taxa ba importasaun karreta, maibé infelizmente la halo no parte konsellu ne’ebé importa karreta ne’e hateten deit katak ita-nia problema transporte públiku ne’e presiza halo intervensaun, tanba mobilizasaun karreta barak fó ameasa mós ba meiu ambiente,” Sekretariu Estadu ne’e afirma.

Nia dehan, Governu presiza aplika rigór prosedimentu importasaun hodi haree ba karreta nia tinan produsaun mai Timor-Leste, tanba liga ba ambiente matak no iha konseitu ba transporte sustentável. 

“Prinsípiu tolu ne’ebé importante aplika ba transporte sustentável mak zero ba poluisaun hosi transporte, zero ba fatalidade asidente iha setór transporte, no zero konjunsaun ka zero engarafamentu,” nia akresenta.

Nune’e, governante ne’e nota katak ikus mai númeru karreta barak, tanba ne’e tenki limita liuhosi aplikasaun taxa importasaun sira, atu nune’e ema la fa’an karreta barak ona.

“Ita labele importa karreta produsaun tinan-lima mai kraik, nune’e espera instituisaun relevante bele aplika ho rigór prosedimentu importasaun karreta atu labele autoriza karreta sukata sira tama, satán karreta besi pezadu tiha mak hodi mai fa’an,” nia tenik.

Jornalista : Natalino Costa

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here