DILI, 09 juñu 2022 (TATOLI)— Adjuntu Sekretáriu Jerál Federasaun Futeból Timor-Leste (FFTL), Frederico Martins, informa sira nia-parte hatoo karta pedidu ba Persatuan Sepak Bola Seluruh Indonesia (PSSI) hodi selesaun nasional U-19 bá halo Training Camp (TC) iha Jakarta.

“Ita haruka ona karta ida ba PSSI atu selesaun nasionál U-19 ba Training Camp iha Jakarta-Indonézia, maibé too agora sira seidauk iha responde, nune’e ita seidauk bele bá,” SekJen FTTL hateten ba Agência TATOLI iha edifisiu FFTL, kinta ne’e.

FFTL nafatin hein iha semana ne’e nia laran bainhira iha konfirmasaun ona mak selesaun sira arranka bá Jakarta hodi halo TC hodi bele prepara-an ba eventu kopa U-19 AFF 2022 ne’ebé sei realiza iha Indonézia iha fulan jullu ne’e.

Iha sorin seluk, Treinadór Prinsipál Selesaun Nasionál U-19, Eduardo Pereira, hateten jagadór sira hahú halo preparasaun másimu iha fíziku no tékniku hodi kompete iha Kopa AFF U-19 iha Indonézia.

“Ami halo ona selesaun ba jogadór hamutuk na’in-13 tanba na’in-ualu iha hela selesaun U-23 sira mai hamutuk tan kompleta ona 21.  Ita kontinua hein de’it desizaun hosi FFTL no PSSI koordena malu ona sira bele arranka bá halo tan Training Camp iha Indonézia,” Treinadór ne’e akresenta.

Treinadór ne’e kontinua koopera ho treinadór profisionál Fabio Maciel da Silva ne’ebé kaer hela selesaun U-23 atu hamutuk hodi fó hanoin ba jogadór sira atu lori futeból ba oin.

“Ha’u koordena nafatin ho treinadór Fabio no instrutór AFC Gopal atu hare hamutuk ita nia ekipa ne’e atu bele hatudu jogu di’ak liu, ita tenke koordena di’ak ho ema profesionál sira atu bele fó mós sira nia hanoin,” tenik.

Jogu AFF U-19 tinan ne’e sei realiza iha nasaun Indonézia hahú loron 4 jullu no partisipa hosi nasaun 11, kompostu, Timor-Leste, Indonézia, Myanmar, Thailandia, Brunei Darusalam, Malázia, Cambodia, Singapura, Filipina no Vietname

Jornalista: Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here