Imajen Espesiál.

DILI, 08 juñu 2022 (TATOLI)—Vise Prezidente Bankada CNRT iha Parlamentu Nasionál, Patrocínio Fernandes, hateten CNRT preparadu hodi hasoru eleisaun parlamentár iha 2023.

“CNRT prontu kualker momentu atu avansa kompete iha eleisaun parlamentár 2023 no partidu ne’ebé preparadu atu hasoru eleisaun mesak,” Vise Prezidente Bankada ne’e hateten ba Agência Tatoli iha Parlamentu Nasionál, kuarta ne’e.

Tanba, nia dehan, preparasaun servisu iha baze kontinua la’o hanesan konsolidasaun no reajustamentu estrutura hodi bele hala’o servisu makaas liután hodi lori vitória iha eleisaun mai.

Tuir Lei númeru 2/2016, 3 Fevereiru (Lei partidu polítiku), artigu 19 (Kongresu no Komferénsia Nasionál partidu sira) iha númeru 1 ne’e hateten, partidu polítiku sira bele kria órgaun ne’ebé julga nesesáriu ba prosekusaun objetivu, pelumenus, órgaun sentrál reprezentativu ida, ho funsaun deliberativa.

Númeru 2 hosi artigu ne’e hatutan, Kongresu ka Konferénsia Nasionál partidu nian ne’e aas liu órgaun deliberativu nivél nasionál, pelumenus dois terços (2/3) hosi delegadu sira-ne’ebé direitamente eleitu hosi respetivu sírkulu partidariu, asegura ho partisipasaun no reprezentatividade hosi baze.

Nune’e mós iha númeru 3 ne’e hateten, Kongresu ka Konferénsia Nasionál iha kompeténsia eskluziva ne’ebé prosede ba aprovasaun estatutu no programa polítiku.

Iha artigu 19 (Kongresu no Konferénsia Nasionál partidu sira) iha númeru 4 ne’e haktuir, Kongresu ka Konferénsia partidu nian tenke halo másimu tinan haat (4) dala-ida.
Tan ne’e, mínimu partidu sira presiza hala’o kongresu nasionál molok hasoru eleisaun parlamentár.

Maibé, Deputadu Patrocínio, dehan CNRT la presiza hala’o ona kongresu tanba foin lalais realiza ona.

“Atu hasoru eleisaun parlamentár ne’e iha lei partidu polítiku hateten katak ba partidu polítiku ida ba iha eleisaun parlamentár mínimu halo konferénsia ka kongresu. Purtantu, partidu CNRT nia kongresu liu tiha ona, ne’ebé iha ne’eba hasai rezolusaun ba situasaun rua ida ba eleisaun prezidensiál apoiu kandidadu Prezidente Repúblika ne’ebé liu ona no mós ida seluk responde ba eleisaun parlamentár,” nia dehan.

Tanba ne’e, nia hateten, kongresu ne’e preparativu atu  partidu iha nia estrutura rasik oinsá mak atu bele la’o ba oin iha eleisaun parlamentár iha 2023

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here