Deputada hosi bankada PLP, Maria Angelina Sarmento. Imajen Egas Cristovão

DILI, 07 juñu 2022 (TATOLI)—Vise Prezidente Partidu Libertasaun Populár (PLP), Maria Angelina Sarmento, hateten tuir kalendáriu tentativa PLP sei realiza kongresu nasionál iha fulan setembru tinan ne’e hodi hili estrutura foun.

Nia dehan, daudaun ne’e preparativu sira la’o hela hodi hahú hala’o konferénsia nivél Postu Administrativu hodi halo reajustamentu no tomada pose ba estrutura hodi halo kompleta estrutura hosi nivél aldeia mai to’o suku no órgaun asosiadu sira nivél suku mai to’o postu hodi sira bele hahú hala’o servisu.

“Desizaun kuadru PLP kona-ba konferénsia no kongresu partidu nian nivél munisípiu 13 inklui RAEOA no nasionál, planu hala’o iha fulan -jullu to’o agostu ne’e tenke rezolve hotu kedas no posivelmente kongresu sei hala’o iha setembru,” Vise Prezidente PLP ne’e dehan ba Agência Tatoli iha Parlamentu Nasionál, tersa ne’e.

Daudaun ne’e sekretáriadu ho Konsellu Polítika Nasionál (CPN, siglá portugés) no Vise Prezidente sira partidu nian servisu haree preparativu tékniku ne’ebé bele ajusta ho kalendáriu sira-ne’ebé sekretáriadu nasionál prepara ona, hanesan dalan ida agora to’o setembru hodi realiza kongresu.

Kongresu ne’e objetivu hili estrutura foun no hosi estrutura foun ne’e mak tenke servisu makaas hala’o prepartivu sira ba eleisaun parlamentár iha tinan 2023.

Tuir Lei númeru 2/2016, 3 Fevereiru (Lei partidu polítiku), artigu 19 (Kongresu no Komferénsia Nasionál partidu sira) iha númeru 1 ne’e hateten, partidu polítiku sira bele kria órgaun ne’ebé julga nesesáriu ba prosekusaun objetivu, pelumenus, órgaun sentrál reprezentativu ida, ho funsaun deliberativa.

Númeru 2 hosi artigu ne’e hatutan, Kongresu ka Konferénsia Nasionál partidu nian ne’e aas liu órgaun deliberativu nivél nasionál, pelumenus dois terços (2/3) hosi delegadu sira-ne’ebé direitamente eleitu hosi respetivu sírkulu partidariu, asegura ho partisipasaun no reprezentatividade hosi baze.

Nune’e mós iha númeru 3 ne’e hateten, Kongresu ka Konferénsia Nasionál iha kompeténsia eskluziva ne’ebé prosede ba aprovasaun estatutu no programa polítiku.

Iha artigu 19 (Kongresu no Konferénsia Nasionál partidu sira) iha númeru 4 ne’e haktuir, Kongresu ka Konferénsia partidu nian tenke halo másimu tinan haat (4) dala-ida.

“Tenke kumpre rekezitu legál kona-ba lei partidu polítiku no lei eleisaun parlamentár ne’ebé vigor,” nia dehan.

Nune’e PLP preparadu hala’o servisu sira kontinua iha baze hodi hodi lori vitória hasoru eleisaun parlamentár iha 2023

“Ne’e estratéjia partidu nian, ami labele ko’alia maibé orsida rezultadu mak ita-boot sira (jornalista) hatene. Maibé agora daudaun konsolidasaun, reajustamentu, pose kuaze la’o iha postu administrativu hotu-hotu no hosi partidu tenke preparadu,” atuál Vise Prezidente Parlamentu Nasionál ne’e hateten.

Maria Angelina Sarmento, seidauk bele fó sai kona-ba pakote atu kompete iha kongresu no mekanizmu eleisaun atu hili estrutura foun tanba seidauk hatene loloos.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here