Sekretáriu Estadu Ambiente, Demétrio do Amaral de Carvalho, akompaña ho ekipa halo konferénsia imprensa iha ámbitu komemorasaun loron internasionál ambiente, iha resintu Igreja Balide, segunda (06/06). Imajen Tatoli/Dalia Fátima

DILI, 06 juñu 2022 (TATOLI)—Sekretáriu Estadu Ambiente (SEA), Demétrio do Amaral de Carvalho, konsidera komemorasaun loron internasionál ambiente importante hodi komunidade bele halo reflesaun, nune’e bele kria ambiente saudável.

Governante ne’e hato’o lia hirak ne’e relasiona ho loron internasionál ambiente iha loron 05 juñu ho tema planeta ida ka ‘one planet’, ne’ebé mundu tomak selebra hanesan tinan-50 establesementu Organizasaun Nasaun Unida ba ambiente, deklara hanesan loron internasionál ba ambiente.

“Loron ne’e importante tebes ba mundu hodi halo reflesaun, hodi kuidadu no proteje nafatin ita-nia ambiente liuhosi labele uza plástiku hodi estraga ambiente no labele sunu rai, tesi ai arbiru no labele kasa animál fuik sira ne’ebé sai identidade nasaun nian, nune’e peskadór sira bele peska ikan maibé labele uza materiál ne’ebé estraga ambiente tasi,” Sekretáriu Estadu Demétrio hateten liuhosi konferénsia imprensa ne’ebé hala’o iha resintu Igreja Balide, segunda ne’e.

Nia dehan, importante tebes ba ema hotu bele kuidadu ambiente, tanba hanesan korelasaun forte, relasiona  ho planeta  terra daudaun hasoru hela krize klimátika, biodiversidade no krize degradasaun ambientál, ne’ebé iha fatin barak hetan polusaun hosi rai no afeita tasi.

“Loron ohin sidadaun mundiál tomak halo reflesaun hodi fó liman ba malu hodi salva guarda planeta rai ba jerasaun futuru mai. Fatin protejida sira importante tebes ba ita tanba hanesan mákina ekolojia hodi tais ita-nia oksijéniu ne’ebé rezerva bee,” nia akresenta.

Aleinde ne’e, implementasaun polítika zero plástiku, iha progresu oituan tanba iha merkadu sira, Governu bandu ona bee ho mililitru 600 mai kraik labele halo importasaun, nune’e halo lixu plástiku sira mós hahú menus.

“Ha’u husu ba komunidade ne’ebé hela iha fatin vulnerável, tenke iha kosiénsia labele sunu rai no tesi ai arbiru iha foho leten tanba nia impaktu bainhira udan la’ós de’it ba ema ne’ebé hela iha rai tetuk, maibé impaktu hahú hosi rai lolon to’o mai tetuk,” Sekretáriu Estadu fó hanoin.

Notísia relevante: SEA kontinua insentiva ba inisiativa entidade halo resiklajen materiál plástiku

Implementasaun dekretu-lei númeru 26/2012 kona-ba lei baze ambiente durante ne’e la’o di’ak tanba lei ne’e rasik sai sumbriña ba lei ambiente sira.

“Iha lei ne’e rasik, dezafiu ne’ebé SEA hasoru mak ema-nia konsiénsia atu muda respeitu ambiente no kuidadu ambiente ne’e mak sei menus, maibé ida-ne’e la’ós SEA nia dezafiu de’it maibé hotu-hotu nian,” Demétrio tenik.

Komemorasaun loron internasionál ambiente ne’ebé mundu tomak selebra ba dala-50, Timor-Leste hola parte iha komunidade internasionál, ba konvensaun foun kona-ba kombate plástiku.

“Ha’u hakarak fó mensajen ba povu Timor-Leste hotu, atu hakribi plástiku no kontribui ba konvensaun foun kona-ba kombate plástiku ne’ebé ohin hahú ita hola parte ba tinan-50 UNEP, nune’e mai ita hamutuk kombate lixu plástiku iha ita-nia rai,” governante ne’e enkoraja.

Padraun dezenvolvimentu ne’ebé Timor-Leste obedese iha tinan 2023 mak SEA tenke reforsa grande opsaun ualu hanesan biodiversidade, lisensiamentu ambientál, reziliénsia hasoru mudansa klimátika no seluk tan.

Iha komemorasaun loron ambientál ne’e SEA realiza atividade hanesan misa agradesementu iha Igreja  São Jose Balide no hamutuk ho komunidade suku zulo, postu administrative Zumalai munisípiu Covalima halo tara-bandu.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here