Produtu lokál iha bazar tradisionál Dili, sesta (16/10). Imajen TATOLI/António Gonçalves.

BOBONARO, 06 juñu 2022 (TATOLI) – Servisu Saúde Munisípiu Bobonaro, husu ema hotu atu ‘hadook-aan’ konsumu ai-haan ne’ebé kontaminadu ho kímika, maibé tenke konsumu ai-han lokál tanba ai-han lokál iha nutrisaun di’ak.

Relasiona komemorasaun loron mundiál ai-han seguru, ne’ebé monu iha loron 16 fulan-outubru, responsável programa nutrisaun servisu saúde munisípiu Bobonaro, Louriano Bere-Coli Serrano, husu ba ema hotu atu konsumu ai-han ne’ebé livre hosi pestisida nune’e bele dezenvolve kresimentu isin no hadook-aan hosi moras.

Responsável Programa Nutrisaun Servisu Saúde Munisípiu Bobonaro, Loriano Berre-Coli Serrano. Imajen Tatoli/Sérgio da Cruz.

“Konsumu ai-han ne’ebé prodús hosi ita-nia agrikultór sira, maibé tenke rai iha fatin ne’ebé seguru hanesan armazein ne’ebé livre hosi udan no anin nune’e bele livre hosi pestisida sira hanesan laho ka barata sira-ne’ebé bele estraga ai-han,” Responsável Programa Nutrisaun Servisu Munisípiu Bobonaro, Louriano informa ba Agência Tatoli, iha kna’ar-fatin, Maliana, segunda ne’e.

Nia dehan, bainhira komunidade sira la asegura ai-han sira-ne’e hosi pestisida molok konsumu mak sei afeta ba saúde hodi hamosu moras sira hanesan; tee-been, kankru, me’ar, Tuberkuloze (TBC, sigla inglés) no moras seluk ne’ebé ataka ema-nia isin-lolon tanba ai-han hirak-ne’e kontamina ona ho bateria.

Louriano esplika, atu konsumu ai-han ne’ebé seguru tuir padraun Ministériu Saúde iha grupu tolu ne’ebé indika duni iha menu loloos ho nia variadade oinoin; ai-han ne’ebé fó forsa ba ema, ai-han ne’ebé dezenvolve ema-nia isin no ai-han ne’ebé bele proteje ema hosi moras.

“Ai-han ne’ebé fó forsa mak hanesan; batar, fehuk, ai-farina, talas, paun no seluk tan. Ai-han ne’ebé dezenvolve isin mai mai hosi; na’an karau, fahi, manu, ikan no mantolun, mai hosi ai-horis nian mak hanesan fore. Enkuantu ai-han ne’ebé bele proteje isin mak hanesan; modo-tahan no ai-fuan sira,” nia esplika.

Maibé tuir observasaun Servisu Saúde Munisípiu Bobonaro nian iha terrenu lihosi atvidade promosaun edukasaun saúde kona-bá utilizasaun ai-han di’ak ba saúde, nota katak, maoria komunidade iha munisípiu refere barak mak seidauk iha koñesimentu atu konsumu ai-han ne’ebé di’ak ba isin-lolon.

“Ami haree ai-han ne’ebé di’ak ne’e sira fa’an atubele hetan osan, ida-ne’ebé la di’ak ne’e mak sira konsumu depois sosa fali ai-han importadu sira-ne’ebé ema kahur ona ho ai-moruk kímiku sira-ne’e ne’ebé bele fó impaktu ba ita-nia saúde,” nia hateten.

Maibé nia promete ba oin sei esforsu halo promosaun kona-bá utilizasaun ai-han seguru ba komunidade sira atu bele konsiensializa konsumu ai-han nutritivu no riku ho vitama atubele dezenvolve ema-nia fíziku no kakutak atubele moris saudável liután.

Responsável Programa Nutrisaun Munisípiu ne’e apela ba komunidade sira iha munisípiu Bobonaro atu evita konsumu ai-han importadu ne’ebé kontamina ona ho ai-moruk kímiku, maibé tenke prioritiza mak ai-han ne’ebé prodús hosi to’os-laran, tanba ai-han lokál hirak-ne’e sei fó vantajen di’ak ba ema-nia isin.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here