Ministru Ensinu Superiór Siénsia no Kultura, Longuinhos dos Santos. Imajen Tatoli/Francisco Sony

DILI, 06 juñu 2022 (TATOLI)–Ministériu Ensinu Superior Siénsia no Kultura (MESSK) sei prepara lejizlasaun ida atu apoiu planu no programa ministériu iha tinan 2023 hodi realiza atividade estájiu profisionál ba estudante finalista non bolseiru ne’ebé iha prestasaun di’ak.

Ministru Ensinu Superior Siénsia no Kultura, Longuinhos dos Santos, hateten planu no programa atu realiza atividade estájiu profisionál ba estudante finalista non bolseiru ne’e sei hahú uluk iha Instituisaun Ensinu Superiór Públiku Privadu sira iha rai-laran, maibé ba sira ne’ebé maka hetan valór di’ak iha indeks prestasaun komulativu (IPK) hosi siénsia natureza presiza valor 2,70 no ba siénsia sosiál 3,00 ba leten, maibé sei halo selesaun.

“Planu no programa ne’e ita hatama ona iha Grande Opsaun Planu (GOP), ne’ebé ita sei kontinua implementa ba tinan oin 2023, maibé programa ne’e rasik ita tau iha programa pilotu kuandu ba futuru maka hetan progresu, ita sei reforsa liután,” Ministru dehan iha Otél Nova Turismo, Bidau Lecidere, segunda ne’e.

Notísia relevante: MESSK planeia inisia estájiu profisionál ba estudante non bolseiru

Governante ne’e informa, bazeia ba planu no programa, MESSK prevee ona orsamentu hamutuk $437.500, ho nune’e ministériu sei presiza estudante hamutuk 445 mak sei hetan oportunidade ba programa ne’e.

Enkuantu, estájiu profisionál ne’e ninia vantajen prioridade liu maka atu promove méritu akadémiku no sei fó dalan ba estudante finalista sira ne’ebé simu ona graduasaun atubele hetan liután esperiénsia iha memória institusionál no fó dalan ba Instituisaun Ensinu Superiór Públiku no Privadu sira atu hetan rekursu umanu kualifikadu.

Atividade estájiu profisionál ne’e promove hosi Reitór sira, ne’ebé bainhira hala’o enkontru ho Governu liuhosi MESSK, ne’ebé apoiu ministériu nian maka sei halo kontaktu ho instituisaun sira tantu públiku, privada no empreza bazeia ba pedidu ne’ebé sei koloka graduadu mellores ba instituisaun sira.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here