Koordenadora, FOKUPERS Uma mahon Maria-Tapo, Dália da Costa Gomes. Imajen Tatoli/Sérgio da Cruz.

BOBONARO, 06 junu 2022 (TATOLI) –  Forum Organizasaun ba Feto sira (FOKUPERS, sigla indonézia) atende vítima violénsia doméstika no violénsia bazea ba jéneru hamutuk na’in-17 iha tinan 2022.

Koordenadora FOKUPERS Uma Mahon Maria-Tapo, Munisípiu Bobonaro, Dalia da Costa Gomes, fó-sai katak, kazu hirak-ne’e rejista hahú hosi janeiru 2022 mai to’o agora.

Nia haktuir, vítima hirak-ne’e mai ho tipu kazu hanesan, abuzu seksuál hasoru labarik idade menoridade, violénsia doméstika, violénsia hasoru labarik, violénsia públiku, insestu no abandona hosi la’en kaben inklui família rasik.

“Vítima 17 ne’e ami halo atendimentu maioria feto no labarik feto sira, iha vítima ida mós mai ho seksu mane tanba hetan baku hosi nia tiu rasik, atu dehan de’it fukun loloos fatór ekonomia sai abut ba problema ne’e, dalaruma sempre akontese violénsia iha uma-kain ida,” nia informa ba jornalista Tatoli, iha kna’ar-fatin, Maliana, segunda ne’e.

Koordenadora ne’e akresenta, daudaun ne’e vítima na’in-14 mak halo ona re-integrasaun ba família inklui sidadaun Indonézia feto ida no agora dadaun temporariamente akomoda hela vítima na’in-tolu ida inan isin-rua no ida seluk ho estatutu mane ho idade menoridade.

Responsável ne’e fundamenta, vítima hirak-ne’e ema-ne’ebé nível edukasaun ladún maibé maioria ema la asesu edukasaun, tanba mai ho idade avansadu no balu la kontinua sira-nia estudu.

Nia argumenta, kazu ne’e sempre akontese ba ema-ne’ebé nivél edukasaun mínimu tanba susar asesu ba informasaun, tanba barak liu mai hosi área rurál inklui balun iha área urbana.

“Dalabarak sira-nia kaben ema-ne’ebé funsionáriu públiku, ita la hatene buat ida uma laran, maske sira-nia parseiru ne’e hatene informasaun, dalaruma ema dehan labele fó sala ba feto, maibé presiza fó sala mós mane, tanba dalaruma mane komprende kuandu emosaun aas labele kontrola, entaun akontese ona,” nia dehan.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here