Pesoal Saude prepara hela vasina Pfizer Booster, segunda, 07/2/2022. Imajen TATOLI/Antonio 'Dasiparu'

COVALIMA, 03 juñu 2022 (TATOLI)–Diretora Servisu Saúde Munisípiu Covalima, Maria Fátima Moniz informa, imunizasaun vasina Pfizer doze dahuluk ba labarik sira ho idade 12 no menus hosi 18 iha Covalima atinje ona 78%.

“Kona-ba imunizasaun vasina Pfizer doze dahuluk ba estudante sira idade 12 to’o menus hosi 18 ne’e atinje ona 78% no ekivalente ho númeru 6,158. Vasina Pfizer ba doze daruak, ita atinje ona 44% ho ekivalente ho númeru 3,376,” Maria Fatima Moniz relata ba Agência Tatoli, iha Resintu AMC, sesta ne’e.

Durante ne’e pesoál saúde sira kobre ona eskola alvu 30-resin ne’ebé mak estudante hosi idade 12 no menus hosi 18, no antes pesoál saúde sira atu fó imunizasaun vasina ne’e halo uluk sensibilizasaun kona-ba benefisiu hosi vasina ba estudante ho nia inan-aman sira.

Ho nune’e, bainhira pesoál saúde sira atu atinje imunizasaun vasina ho 100% presiza kooperasaun diretór servisu edukasaun Covalima no diretór eskola sira maibé durante ne’e koordenasaun di’ak tebes.

“Ita atu atinje imunizasaun vasina 100% iha kooperasaun ne’ebe di’ak entre diretór servisu edukasaun Covalima no diretór eskola sira ho pesoál saúde hodi la’o tuir oráriu ne’ebé mak ami estabelese ona,” nia dehan.

Nia informa, estoke vasina Pfizer iha armajen Servisu Saúde Munisípiu Covalima hamutuk vial 200-resin, bainhira menus ona servisu saúde hato’o pedidu ba iha nasionál hodi haruka vasina mai iha Covalima.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here