PA RAEOA fiskaliza konstrusaun haat ba fasilidade saúde públika iha Pante Makasar. Imajen mídia ZEEMS.

OÉ-CUSSE, 03 Juñu 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kinta ne’e halo fiskalizasaun ba projetu konstrusaun ba fasilidade saúde, hamutuk unidade haat, iha suku Costa, sub-rejiaun Pante Makasar, hodi enkoraja empreza sira atu aselera projetu hirak-ne’e tuir termu kontratu.

Atividade fiskalizasaun ne’e, akompaña hosi Sekretáriu Rejionál ba Asuntu Saúde, Manuel da Costa, hodi fiskaliza ba projetu konstrusaun armazein ai-moruk, banku sangue laboratóriu, sala Unidade Kuidadu Intensivu (ICU), no sala izolamentu iha Hospital Referál Oé-Cusse ne’ebé kontrui iha Santa Rosa, suku Costa, sub-rejiaun Pante Makassár.

“Ita halo fiskalizasaun ba konstrusaun fasilidade saúde nian, objetivu hosi fiskalizasaun ba projetu haat ne’e atu haree direita progresu serbisu no haree mós planu serbisu hodi garante kualidade konstrusaun nune’e bele aselera tuir termu kontratu, nune’e bele utiliza ona ba atendimentu públiku,” Arsénio Bano, ko’alia iha Oé-Cusse, sesta ne’e.

Prezidente Autoridade ne’e hala’o fiskalizasaun dahuluk, iha projetu konstrusaun edifísiu armazenamentu ai-moruk, konstrui iha bairru Horta, daudaun ne’e nia progressu serbisu atinje ona 70%, ne’ebé ezekuta hosi empreza, Fitun Sanane Unip. Lda, ho valór kontratu $427,615.95, ho durasaun fulan-haat

Fiskaliza daruak iha projetu konstrusaun edifísiu izolamentu, ho nia progresu serbisu atinje 68%, konstrusaun ne’e ezekuta hosi empreza Erihjocia Unip. Lda, ho valór kontratu $288,082.66, ho durasaun serbisu durante fulan-haat.

Nune’e mós halo fiskalizasaun ba projetu konstrusaun edifísiu banku sangue no laboratóriu, nia progresu serbisu atinje ona 68%, konstrusaun ne’e ezekuta hosi empreza, Dinhola Unip. Lda, ho valór kontratu $210,742.43, ho durasaun serbisu fulan- haat.

Fiskaliza ikus iha projetu konstrusaun sala izolamentu Unidade Kuidadu Intensivu (ICU, sigla inglés), progresu serbisu foin atinje 30%, konstrusaun ne’e ezekuta hosi empreza Zero Quatro Lifau Unip.Lda, ho valór $200-resin.

Nune’e Sekretáriu Rejionál ba Asuntu Saúde, Manuel da Costa, informa, orsamentu hirak-ne’e prevee hosi fundu COVID-19, balu uza konstrusaun kuarentena ne’ebé konstrui iha sub-rejiaun haat, Oésilo, Pássabe, Nítibe no Pante Makasar.

Notísia relevante: RAEOA aloka millaun $1-resin konstrui fasilidade saúde públika

Jornalista     : Abílio Elo Nini
Editór : Evaristo Soares Martins

PUBLISIDADE HUSI MTCIiklan