Diretór Jerál STAE, Acilino Manuel Branco. Imajen TATOLI/Egas Cristóvão

DILI, 03 juñu 2022 (TATOLI)—Sekretariadu Tékniku Administrasaun Eleitorál (STAE), sesta ne’e, hala’o enkontru ho Ministériu Negósiu Etranjeiru no Kooperasaun (MNEK) no embaixadór balun hodi ko’alia kona-ba Resensiamentu Eleitorál Atualizasaun Baze Dadus (REABD) no preparasaun ba eleisaun parlamentár 2023.

Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten enkontru ida ohin embaixadór balun sujere atu kria sentru resensiamentu no sentru votasaun foun iha diáspora hanesan Indonézia no Filipina, ida-ne’e hanesan avaliasaun no agora STAE iha hela faze reajustamentu ba iha planu operasionál eleisaun parlamentár 2023.

“Agora iha faze preparasaun anuál no iha futuru prevee no trasa orsamentu hodi bele konsidera iha planu. Hosi parte MNEK mós ohin informa katak iha posibilidade sira mós sei aumenta tan sentru resensiamentu foun iha país ruma. Nune’e parte notariadu sei fó atendimentu ba sidadaun sira iha nasaun Filipina no iha Indonézia tanba iha ne’ebá mós timor-oan barak,” Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten ba jornalista sira, iha salaun STAE Caicoli, Dili, sesta ne’e.

Iha enkontru ne’e mós hakarak halo resensiamentu iha diáspora atu bele atualiza fali dadus hodi garante sidadaun sira-nia direitu de votu iha nasaun refere, tanba antes ne’e eleisaun só bele hala’o de’it iha Korea, Inglatera, Portugál no Austrália. 

Ministériu Negósiu Estrajeiru no Kooperasaun (MNEK) liuhosi Embaixadór Korea ho Embaixadór Austrália hameno liuhosi Diretór Jerál MNEK, husu atu aumenta tan sentru votasaun iha Korea ho Austrália.

Diretór Jerál ba Asuntu Portocolares e Cosulares, Ministériu Negósiu Estrajeiru no Kooperasaun (MNEK), José Amorin, hateten koordena ho embaixadór Timor-Leste sira iha diáspora atu mellora tan prosesu eleisaun parlamentár iha tinan 2023.

“Ami koordena ho embaixadór Timor-Leste sira iha diáspora atu mellora tan prosesu eleisaun parlamentár iha tinan oin. Ezemplu, Inglatera iha sentru votasaun tolu hosi Oxford, Peterburgh e Diamond da Irlanda do Norte,” nia dehan.

Tanba iha sidadaun timor-oan sira iha Portugál, nune’e Embaixadora Timor-Leste iha Portugál husu atu aumenta tan sentru votasaun iha rejiaun seluk hanesan Korea do Sul tuir númeru traballadór ne’ebé mak iha.

“Ami husu mós kria sentru votasaun iha Filipina, Cabo-Verde, Moçambique no Indonésia ho totál estudante ne’ebé mak iha baze ba númeru estudante timor-oan sira. Bainhira estudante mak liu 100, ita kria sentru votasaun foun. Maibé atu kria sentru votasaun foun iha Indonézia ne’e presiza halo análiza situsaun sira iha ne’ebá,” nai dehan.

Responsavel ne’e hatutan, dadus sidadaun iha Reinu Unidu no Irlanda do Norte, kuaze rihun 30.

STAE rejistu eleitór elijivel iha territóriu nasionál hamutuk 859.613, iha estranjeiru, 852.500 ne’ebé rejistadu iha nívél nasionál 7.113 iha diáspora. 

Jornalista  : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here