Vítima Domingos Ximenes ne'ebé hetan baku hosi PX bainhira halo tratamentu iha Horex Baucau, kinta (02/06). Imajen: Espesiál.

BAUCAU, 02 juñu 2022 (TATOLI) – Domingos Ximenes ho idade 61 tenke transporta ba Hospital Nacional Guido Valadares (HNGV), Dili tanba kanek todan iha ulun hafoin baku hosi rian rasik ho inisiál PX iha kuarta kalan, 01 juñu iha área Kairala, suku Buibau, postu administrativu Baucau vila.

Kazu refere akontese iha kuarta kalan, 01 juñu purvolta oras 19:00 bainhira antes haan kalan, vítima buka lampra iha suspeitu nia kuartu atu fó-haan asu hakiak, bainhira loke odamatan kuartu, suspeitu direitamente lori besi-kanu baku vítima nia liman parte karuk no kontinua baku iha ulun no hasan parte karuk tohar ne’ebé rezulta vítima Domingos Ximenes tenke evakua ba Hopital Rejionál Eduardo Ximenes (HorEX) Baucau.

“Ha’u loke odamatan pai tuur hela, laiha ona forsa tanba raan tún, ami husu ajuda ba viziñu nia karreta hodi evakua ba ospitál,” Oan hosi vítima, Anina Ximenes Guterres hateten iha Vila Nova, kinta ne’e.

Komandante Polísia Nasionál Timor-Leste (PNTL) Eeskuadra Baucau vila,  Inspetór Marcelino Fraga, esplika, suspeitu PX konsege kaptura iha kuarta-kalan iha oras purvolta 20:00 iha área merkadu Vila Nova, Baucau.

Motivu loloos hosi kazu refere daudaun ne’e sei iha prosesu investigasaun no suspeitu PX sofre moras.

“Motivu depois vítima kondisaun di’ak mak bele hatene, maibé suspeitu nia kondisaun moras mentál,” Inspetór Marcelino Fraga akresenta.

Hafoin vítima halo tratamentu iha HorEX Baucau, médiku sira deside transfere ba HNGV tanba kanek ne’ebé vítima enfrenta presiza halo tratamentu intensivu.

Enkuantu, suspeitu PX daudaun ne’e detein hela iha sela Polísia Nasionál Timor-Leste (PNTL) eskuadra Baucau vila hodi submete ba prosesu investigasaun.

Jornalista    : Natalino Belo

Editór           : Evariso Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here