Octaviano Domingos da Costa Fátima, estudante ne'ebé subtitui PAM Baucau iha selebrasaun loron mundiál ba labarik, kuarta (01/06). Imajen Tatoli/Natalino Belo.

BAUCAU, 01 juñu 2022 (TATOLI) – Octaviano Domingos da Costa Fátima, asume kargu Prezidente Autoridade Munisipál Baucau durante oras haat iha ámbitu selebrasaun loron mundiál ba labarik.

Octaviano Fátima ho idade 14 nu’udar estudante Ensinu Báziku Santo António Baucau, subtitui Prezidente Autoridade Munisipál Baucau ho durasaun oras haat, maibé nia parte urgullu tanba bele iha mehi atu lidera munisípiu Baucau iha futuru.

“Bainhira sai prezidente autoridade munisipál iha futuru, ha’u sei fó atensaun espesiál ba labarik sira, liuliu fó oportunidade atu sira hetan direitu asesu ba edukasaun,” Octavio Fátima hateten iha Sentru Konvensaun Baucau (CCB, sigla portugés), kuarta ne’e.

Octiavio konsidera labarik nu’udar jerasaun kontinuadór nasaun nian nune’e husu atu estuda maka’as hodi prepara-aan didi’ak liutan iha futuru.

Estudante sira-ne’ebé asume kargu provizóriu autoridade sivíl no militár Baucau iha selebrasaun loron mundiál ba labarik, kuarta (01/06). Imajen Tatoli/Natalino Belo.

Nia dehan, xave atu susesu mak presiza estuda no hadook-aan hosi ransu livre hanesan konsumu droga, alkól nune’e futuru bele sai lideransa di’ak.

Diretora Ezekutiva Fundasaun Uma Paz Munisípiu Baucau, Felismina Belo hateten objetivu troka papél iha selebrasaun loron mundiál ba labarik atu inspira no fó mehi ba labarik sira, liuliu estudante sira katak labarik mak jerasaun kontinuadór.

“Objetivu atu fó mehi no inspira, forma sira iha hanoin nune’e bele atinje iha sira-nia mehi no motiva sira atu estuda nune’e bele asume kargu refere iha futuru,” Felismina Belo hateten.

Alende subtitusaun kargu Prezidente Autoridade Munisípiu Baucau, ativade refere hala’o mós ba kargu sira hanesan Komandante Polísia Nasionál Timor-Leste (PNTL) munisípiu Baucau, Provedória Direitu Umanu no Justisa (PDJH, sigla portugés), Komandante Komponente Terrestre iha FALINTIL-FDTL inklui kargu superiór seluk.

Istória hosi loron internasionál ba labarik hahú iha tinan 1856 bainhira Pastór Charles H. Leonard hosi Universidade Churs of Chelsea hamosu loron dedikasaun ba labarik.

loron refere define hosi organizasaun Women’s International Democratic Federation ne’ebé liuhosi kongresu iha Moskow tinan 1949 no hahú selebrasaun dahuluk iha loron 1 juñu 1950.

Inportánsia hosi selebrasaun loron internasionál refere mak atu fó respeita no hasa’e koñesementu ba labarik sira.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here