MS liuhusi Diresaun Nasionál Apoiu Servisu Ospitalár hamutuk ho MACLN, hetan suporta hosi médiku HNGV no Ekipa Brigada Médika Xineza fó konsulta espesializada ba veteranu no atigu kombatente libertasaun nasionál iha munisípiu Liquiça. Imajen/Espesiál

DILI, 31 maiu 2022 (TATOLI)— Ministériu Saúde (MS) liuhusi Diresaun Nasionál Apoiu Servisu Ospitalár hamutuk ho Ministériu Asuntu Kombatente Libertasaun Nasionál (MACLN), hetan suporta hosi médiku Hospitál Nasionál Guido Valadares (HNGV) no Ekipa Brigada Médika Xineza fó konsulta espesializada ba veteranu no antigu kombatente libertasaun nasionál iha munisípiu Liquiça.

Atividade konsulta espesializada ba veteranu sira ne’e hodi dignifika veteranu sira nia sakrifisiu, garante atendimentu saúde ba veteranu no antigu kombatente libertasaun nasionál.

Xefe Departamentu Apoia no Koordenasaun Servisu Espesializadu iha Ministériu Saúde, Nilton da Costa-Cruz, informa médiku espesialista fó tratamentu saúde ba veteranu na’in-199 iha munisípiu Liquiça.

“Fó tratamentu saúde espesializada ba veteranu sira iha munisípiu Liquiça ho objetivu ida katak atu dignifika veteranu sira-nia sakrifisiu ba luta indepedénsia tanba ita hatene katak ita nia-veteranu barak mak seidauk hetan tratamentu dignu ba sira-nia kondisaun,” Xefe Departamentu ne’e hateten ba Agência TATOLI iha knaar fatin-Caicoli,Dili, tersa ne’e.

MS liuhusi Diresaun Nasionál Apoiu Servisu Ospitalár hamutuk ho MACLN, hetan suporta hosi médiku HNGV no Ekipa Brigada Médika Xineza fó konsulta espesializada ba veteranu no atigu kombatente libertasaun nasionál iha munisípiu Liquiça. Imajen/Espesiál

Konsulta espesializadu ne’e kompostu husi médiku espesialista Timoroan no Xineza hosi medisina interna, kardiolojista, otorrinolaringolojista, oftamolojista, dentista, ortopedista, urolojista, Akupunturista, jinekulojista, sirurjiaun jerál no dermatolojista.

Veteranu na’in-199 ne’e maioria moras matan, tilun, fuan no ruin no mós problema pulmaun, nune’e médiku sira halo kedan intervesaun no fó aimoruk atu sira konsumu inklui fahe ókulu ba sira

“Sira ne’ebé mak labele halo médíku labele intervesaun halo reseita atu kontinua mai halo tratamentu iha Hospitál Nasionál Guido Valadares (HNGV) hanesan veteran ne’ebé moras króniku iha ruin na’in-ida, matan ida no tilun na’in-ida. Tanba iha atividade konsulta espesializada ne’e, médiku sira mós lori ekipamentu Raiu-X hodi leno veteranu sira” nia afirma.

Tuir oráriu iha semana oin loron 04 juñu ne’e, kontinua halo tratamentu espesializadu ba veteranu sira iha munisípiu Aileu, hodi identifika tan problema sira ne’ebé mak veteran sira enfrenta durante ne’e.

“Ita fó tratamentu espesializada ne’e hanesan tratamentu sekundáriu nian,entaun ho problema  ne’ebé mak iha  ekipa halo intervensaun  no operasaun kedas hodi  bele rezolve  saida mak  tinan barak sira hasoru ,” nia afirma.

Jornalista : Felicidade Ximenes

Editór        : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here