Padre Parókia Santo António Baucau, Manuel da Silva Ximenes. Imajen Tatoli/Natalino Belo.

BAUCAU, 31 maiu 2022 (TATOLI) – Arsebispu Arkidioseze Metropolitana Dili, Don Virgílio do Carmo Da Silva,  marka istória iha Uma Kreda Timor-Leste nian hafoin hetan nomeasaun hosi Papa Francisco.

Padre Parókia Santo António Vila Antiga, Baucau, Manuel da Silva Ximenes, SDB, husu sarani Katólika espesiál parókia Santo António Baucau atu  agradese ba Maromak tanba hafoin tinan 507 ezisténsia Igreja Katólika foin ba dahuluk iha uma kreda timor hetan bibi-atan Don Virgílio do Carmo da Silva nu’udar kardeál dahuluk.

“Nia lori Timor ne’e ba mundu tanba futuru mai serbisu nu’udar kardeál sei prezensa to’o tempu hili Papa sira mak sei hili, nia lori timor ba mundu atu rekoñese timor,” Padre Paróku Parókia Santo António Baucau hateten iha Vila Antiga, tersa ne’e.

Padre Manuel urgullu tanba timor-oan mós bele iha mundu nia oin no Maromak hadomi rai timor nune’e liuhosi konfiansa Vatikanu nian hili Don Virgílio do Carmo da Silva hanesan kardeál dahuluk iha istória Igreja Katólika timor nian.

Maske iha dezafiu hasoru kreda katólika iha timor maibé sarani sira tenke nafatin iha fiar no komporta-aan di’ak liután nu’udar ema sarani tanba mundu sei nafatin rekoñese Timor katak iha identidade rasik hanesan kulturál no kristanismu katólika.

“Ha’u apelu ba sarani sira atu hadomi vokasaun nu’udar kristaun, katólika nu’udar kaben-na’in, joven no estudante ne’ebé di’ak hahalok hanesan kristu hanorin atu nune’e apoia bibi-atan sira iha uma-kreda Katólika Timor-Leste,” Padre ne’e hateten.

Tuir planu, Parókia Santo António Diosece Baucau sei realiza misa agradesimentu hafoin Don Virgílio do Carmo da Silva simu promesa nu’udar kardeál iha Vatikanu Roma loron 27 agostu.

Funsaun Kardeál tuir lei kanóniku 349 CIC 83 hanesan kardeál nu’udar eleitór, iha direitu eskluziva dentru koléjio kardinalísiu ne’ebé fó votu segredu hodi hili Amu Papa foun bainhira Amu Papa rejigna-aan ka hakotu iis.

Kolejialmentu fó konsellu ba Amu Papa iha konsistóriu hodi haree ba kestaun no urjensia sira kona-ba vida sarani iha igreja universál no individualmente kada kardeál iha ofísiu anexa ajuda Amu Papa hodi tau matan ba Igreja iha mundu tomak.

Iha loron 30 janeiru 2016, Amu Virgílio do Carmo da Silva, SDB hetan nomeasaun hosi Papa Francisco hodi sai Bispu Dioseze Dili nian no iha Setembru 2019 foti nia sai Arsebispu dahuluk ba Arkedioseze Metropolitana Dili nian.

Hafoin, iha loron 29 maiu 2022, iha konkluzaun Regina Coeli nian, Papa Francisco fó sai naran hirak-ne’ebé atu hola parte iha Koléjiu Kardeál sira-nian hamutuk na’in ruanulu-resin-ida (21) no entre sira ida mak Mons. Virgílio do Carmo da Silva, SDB.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here