Prezidente Repúblika, José Ramos-Horta, konvoka enkontru Association of Timorense Students in China (ATSC) iha Palásiu Prezidente Nicolau Lobato, Bairru Pite, tersa (31/05). Imajen Tatoli /Egas Cristóvão.

DILI, 31 maiu 2022 (TATOLI)—Prezidente Asosiasaun Estudante Timor-oan iha Xina, (AETC, siglá portugés), Esmeraldito Ferreira, husu Prezidente Repúblika (PR), José Ramos Horta, atu apoiu ho meiu komunikasaun diplomátika hodi fasilita bolseiru timor-oan na’in-130 hodi fila-fali ba Xina hodi kontinua hala’o sira-nia estudu.

“Objetivu hasoru malu ho Prezidente Repúblika atu hato’o ami-nia preokupasaun oinsá Prezidente bele apoiu bolseiru timor-oan besik 130 fila-fali ba Xina hodi kontinua sira-nia estudu, bele ramata tuir tempu ne’ebé iha,” Esmeraldito hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, tersa ne’e.

Estudante hirak ne’e, antes ne’e mai Timor-Leste ho razaun tanba halo renovasaun ba pasaporte tanba iha Xina labele halo renovasaun no la hetan renovasaun sei hetan deportasaun, ho ida-ne’e estudante maiória mak fila mai Timor-Leste no iha estudante balun iha momentu ne’eba hetan feriás hosi eskola durante loron 20, nune’e mai pasa ferias iha Timor-Leste.

“Maibé estudante sira-ne’e bainhira renova tiha passaporte iha Timor-Leste hotu atu fila ba Xina maibé ho pandemia COVID-19 mosu labele fila no mós sira-ne’ebé pasa feriás hafoin atu fila situasaun COVID-19 mós tama,” nia dehan.

Estudante sira-ne’e hala’o estudu iha nasaun Xina no kapitál Wuhan ne’ebé nu’udar primeiru mosu kazu COVID-19 labele fila ba Xina, tanba problema pandemia aplika hela lockdown no vou internasionál laiha entaun difikulta tebes.

“Problema ne’ebé agora estudante sira hasoru mak barak daudaun iha Timor-Leste laiha semangat hodi kontinua estuda tanba ho problema internet, no estudante ne’ebé iha iha área estudu ba materia enjenaria no medisina sira laiha prátika,” nia dehan.

Tanba iha kursu balun rekere estudante sira atu halo prátika iha Laboratóriu ospitál no iha Timor-Leste laiha, nune’e difikulta sira atu finaliza estudu ne’ebé determina ona.

Enkuantu estudante sira seluk ho área estudu finansa, ekonomia, relasaun internsionál hala’o estudu duni hosi online no foin lalais balun konsege gradua ona, ne’ebé tuir dadus iha bolseiru timor-oan ne’ebé iha Xina hamutuk 200-resin no agora 130-resin, nune’e hirak ne’ebé ho área espesializada hanesan medisina presiza fila hodi kompleta estudu.

“Estudante ba eskola iha Xina ne’e maiória povu aileba nia oan maibé sira ba Xina tanba ho bolseiru oferese hosi Governu Xina ne’ebé agora presiza apoiu duni sira fila hodi kontinua estudu bele ramata tuir tempu termina,” nia hateten.

AETC halo hela komunikasaun ho parte Governu la’o nafatin hodi buka dalan ne’ebé iha hela prosesu nia laran no hein tempu badak bele iha ona solusaun.

Tan ne’e, ho sorumutu ho Prezidente Repúblika mós bele fó apoiu liuhosi komunikasaun diplomátika ho nasaun Xina oinsá fasilita estudante sira hodi fila.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here