Jogador São Miguel tenta hadau bola hosi jogadór Sobo-ai nia ain. Imajen Tatoli/Sérgio da Cruz.

BOBONARO, 30 maiu 2022 (TATOLI) – Kompetisaun jogu futeból sub-23 époka 2022 ne’ebé realiza iha kampu futeból Maliana, segunda ne’e,klubu Sobo-ai husi suku Oe-leu, postu administrativu Bobonaro susesu hakat ba faze kuarta-finál hafoin halakon adversáriu São Miguel ho rezultadu  2-1.

Iha menutu dahuluk ekípa rua lansa kedas kontra atake tuir rítmu jogu ne’ebé haraik hosi treinadór idak-idak nian, São Miguel hatudu jogu kalma modelu bola rai, Sobo-ai jogu modelu ofensivu ho intensaun atu lees uluk guarde-rede avdersáriu.

Ekipa rua lansa hela kontra atake, São Miguel hatais farda kinur metan, Sobo-ai uza farda kalsa metan. Imajen Tatoli/Sérgio da Cruz.

Nune’e hahú hosi menutu 5 ba leten ekipa rua nafatin iha votade atu hadau bola ba malu, maibé Sobo-ai forte liu tanba hadau bola barak-liu ikus mai iha hetan duni oportunidade dahuluk iha menutu 12, jogadór Rosalino ‘Gana’ (69) susesu lees uluk rede adversáriu hodi muda rezultadu ba 1-0.

Ho golu ne’e ambiente kampu kontinua manas liután ekipa Sobo-ai mai hosi dook ne’e kotinua hamoris sira-nia espíritu buka bola tanba hetan apoia no motivasaun maka’as hosi adeptu sira, nune’e iha menutu 15 ba leten sira domina bola joga ho meia kampu soe bola aas barak ba oin hodi fó oportunidade ba avansadu Artur Soares (10) atu prodús golu ruma.

Iha menutu 20 sutu barak mak avansadu ne’e lansa, maibé konsege hela direita hanesan buat mamuk ida tanba bola barak mak guarda-rede adversáriu salva no balu la kona alvu, enkuantu haree ba presaun folin laek hirak-ne’e, hamoris fila-fali São Miguel nia jogu tanba hetan orientasaun hosi treinadórr tenke duir bola barak ba hadau malu iha oin.

Ikus mai esforsu hirak-ne’e konsege folin duni tanba iha menutu 34 jogador Emanuel (17) susesu responde golu ida liuhosi sutu livre hodi hatuur rezultadu ba 1-1, rezultadu mantein to’o termina primeira parte.

hakat ba segunda parte ekipa rua nafatin fó presaun ba malu tanba klube rua ne’e hakarak aumenta pontu ho intensaun atu hakat ba faze kuarta-finál, maibé 40 ba leten presaun hirak-ne’e nafatin hela ho presaun tanba defeza klubu rua ne’e metin hotu.

Jogu iha menutu 50 ba leten treinadoó idak-idak sobu fali estratéjia jogu ho modelu ofensivu hotu,maibé haree ba jogador sira-nia enérjia hahú menus, treiador Sobo-ai Vitorino Gusmao, dada sai hotu kedas no hatama fila fali jogadór ne’ebé estamina forte.

Ikus mai asaun hirak-ne’e konsege lori rezultadu osan mean tanba iha menutu 64 jogador Carlito (25) susesu fura golu ida hodi aumenta rezultadu ba 2-1. Ho golu hosi jogador ne’e mak konsege lori vitoria ba ninia ekipa haka tba kuarta-finál tanba maske São Miguel esforsu makas atu hatuur pontu hanesan maibé nafatin la akontese to’o árbitru hakotu jogu, nune’e Sao Miguel tenke simu konsekuénsia fila ba uma, Sobo-ai hakat faze kompetetivu liután iha jogu tuir mai.

Biban ne’e, Treiandór Klubu Sobo-ai Vitorino Gusmao, kontente ho rezultadu ne’ebé nia ekipa hatudu tanba mai hodi postu administratrivu maibé durante jogu nunka derrota kontra ekipa sira iha kapitál Maliana.

“Ami-nia esforsu ladún másimu tanba jogador barak mak la mai, iha Dili ,maibé ba oin ami sei esforsu halo preparasaun di’ak liután, ho esperansa ida katak maske ami mai rai dook maibé fila tenke lori duni rezultadu hodi hatudu  ba ema hotu katak maske ami iha foho mós la lakon ho sira iha vlla,” nia promete.

Jogu ne’e lidera hosi árbitru Domingos Viçente ‘Juragan’, asistente primeiru Longuinhos ‘Gepeng’, asistente segundu Peregrinho dos Reis no árbitru suplente Lucas Feliz. Árbirtu hirak-ne’e hetan ona sertifikadu lisensa (D) no (C) hosi Federasaun Futeból Timor-Leste (FFTL) iha tinan hirak liubá.

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here