Líder no membru Partidu Frente Revolusionáriu Timor-Leste Independente (FRETILIN) hala’o reuniaun alargada. Imajen/Espesiál.

DILI, 30 maiu 2022 (TATOLI)—Prezidente Partidu Frente Revolusionáriu Timor-Leste Independente (FRETILIN), Francisco Guterres Lú Olo, informa liuhosi rezultadu reuniaun alargada Komite Sentrál Fretilin (CCF, sigla portugés) iha 28-29 maiu ne’e, hodi hasai ona rezolusaun haat atu realiza kongresu ansionál dalimak.

“Komite Sentrál Fretilin halibur atu ko’alia kona-ba tranzisaun lideransa FRETILIN nian no ita atu haree forma lejitimidade ne’ebé mak FRETILIN atu opta ba halo prosesu ida-ne’e, atu la’o ba oin,” Lú Olo hateten iha nia  intervensaun abertura iha enkontru refere, liuhosi komunikadu imprensa ne’ebé Tatoli asesu, segunda ne’e.

Nia hatutan, rezolusaun dahuluk mak kona-ba desizaun konsensuál hodi prosede ba eleisaun lideransa partidu ba mandatu tuir mai liuhosi V kongresu nasionál.

Daruak, rezolusaun ida mak atu konvoka no halo ajenda ba V kongresu nasionál ba loron-ualu (8) to’o loron-10 fulan setembru tinan 2022, ho anúnsiu ofisiál orgaun sentrál eleitu ba loron 11 fulan-setembru, loron komemorasaun tinan 48 hosi disolusaun ASDT no kriasaun FRETILIN.

Datoluk, aprova mós rezolusaun hodi elojia Presidente Francisco Guterres Lú Olo tanba dezempeñu ho korajem no sabedoria durante mandatu nu’udár Prezidente da Repúblika husi 2017-2022.

Dahaat, rezolusaun ida seluk hodi kongratula Sekretáriu Jerál, Mari Alkatiri ba lideransa ho brani no determinasaun ba partidu FRETILIN durante tinan lima ikus, ho auzensia temporária Prezidente Partidu hosi atividade partidária.

Enkontru ne’e hala’o iha iha salaun Canossa Has Laran, Dili, ne’ebé lidera hosi Prezidente Partidu FRETILIN, Francisco Guterres “Lú-Olo”, nu’udár mós reuniaun dahuluk ne’ebé mak Lú-Olo prezide hafoin ativu fali iha CCF hodi assume nia knar polítika iha FRETILIN depois, hafoin hakotu ninia misaun nu’udár Xefe Estadu iha tinan lima ikus ne’e.

Sekretáriu Jeráal FRETILIN, Mari Alkatiri,  hateten FRETILIN ninia prosesu eleisaun ba lideransa FRETILIN nian hala’o ona liuhosi maneira oioin hanesan eleisaun iha kongresu no eleisaun direta.

“Iha kongresu nasionál FRETILIN 2006, ita deside hodi halo desizaun atu hili lideransa másimu FRETILIN nian no ita halo ida-ne’e iha konjuntura no kontestu polítika ida,” nia esplika.

Alkatiri hateten, iha 2011 FRETILIN deside hodi hala’o eleisaun direta ba hili lideransa FRETILIN, iha konjuntura no kontestu oin seluk ida no ohin loron iha konjuntura no kontestu polítika ne’ebé mak diferensa mós.

Iha enkontru alargada ne’e partisipa mós hosi Jenerál Reformadu Lere Anan Timur, membru segunda Jerasaun Komité Sentrál FRETILIN, ne’ebé partisipa iha reuniaun nu’udár konvidadu espesial.

Iha intervensaun, Lere Anan Timur  hateten ba menbru CCF no konvidadu sira-ne’ebé prezente atu konta mós ho nia hamutuk ho Sekretariu Jeral, Prezidente Partidu, sei servisu hamutuk atu halo boot liutan FRETILIN.

Iha sorumutu ida ne’e, Komite Central FRETILIN rona mós aprezentasaun ida hosi Komisaun Nasional Preparasaun no Organizasaun (KNPO) kona-ba sondajen interna ida relasiona ho eleisaun ba lideransa FRETILIN, progresu servisu tékniku no polítiku sira-ne’ebé mak hala’o ona ba kongresu nasionál no eleisaun lideransa FRETILIN nian nomós kalendáriu programa no atividade FRETILIN nian ba to’o kongresu nasionál.

Iha loron daruak halo mós sorumutu debate no analize kle’an kona-ba eleisaun prezidensial ronde rua ne’ebé foin liu ba no situasaun politika atual, hodi haree mós área sira-ne’ebé presiza reforsa no hadi’a, hodi bele hakat ba oin forte no unidu liután.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here