Governu Austáalia no UNICEF oferese vasina Pfizer BioNTech hamutuk doze 149,760 ba Governu Timor-Leste. Imajen Tatoli/Nelson Sousa.

DILI, 30 maiu 2022 (TATOLI)— Governu Austrália liuhusi The Department of Foreign Affairs and Trade (DFAT) hamutuk ho United Nations International Children’s Emergency Fund, (UNICEF), sábadu (28/05), oferese tan vasina Pfizer doze 149.760 ba Timor-Leste. 

“Vasina hirak ne’e ita hetan ajuda hosi Governu Austrália liuhosi UNICE, hodi ita kontinua implementa programa vasinasaun iha munisípiu hotu liuliu labarik sira ne’ebé elijivél ho idade 12 ba leten,” Diretór Aprovisionamentu Servisu Autonómu Medikamentu no Ekipamentu Saúde (SAMES), Nelson Correia, hateten ba Agência TATOLI iha knaar fatin SAMES, Kampu-Alor, segunda ne’e.

Governu Timor-Leste liuhosi Ministériu Saúde simu apoia hosi UNICEF no fundu husi parseiru DFAT ho totál orsamentu inklui kustu transportasaun hamutuk $1,010,880.

“Kona-ba distribuisaun ita hahú kedas ita simu iha loron sábadu too ohin loron ita distribui ba fasilidade saúde sira iha munisípiu hotu, atu nune’e komunidade sira bele vasina hodi kombate moras COVID-19 iha ita-nia rain,” nia informa.

Nune’e, nia agradese ba Governu Austrália no UNICEF tanba kontinua hatudu kompromisu hodi apoia Timor-Leste ba kombate COVID-19.

Iha fatin hanesan, Reprezentante UNICEF iha Timor Leste, Bilal Durrani, afirma UNICEF orgullu no apresia ba Governu Austrália tanba bele apoia fundu hodi halo akizasaun ba iha ba vasina hodi kontra ka kombate COVID-19 iha Timor-Leste.

“Ami orgullu no apresia ba Governu Austrália iha aspetu oin-oin kona-ba repsonde COVID-19 iha Timor-Leste no ajuda fornese vasina hodi proteje ema sira ne’ebé mak vuneravél liu hodi kontra moras no mate,” Bilal Durrani    informa.

Tuir dadus hosi Ministériu Saúde, too horsehik labarik idade 12 too menus 18 ne’ebé simu ona vasina Pfizer doze dahuluk atinje ona 79,4% no doze daruak atinje ona 57,7% iha territóriu nasionál.

Jornalista : Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here