Prezidente Repúlika José Ramos Horta. Imajen Tatoli/Francisco Sony.

DILI, 27 maiu 2022 (TATOLI) – Prezidente Repúblika, José Manuel Ramos Horta, seidauk submete pedidu fiskalizasaun abstratu ba Tribunál Rekursu kona-ba Orsamentu Retifikativu tanba sei konsulta ho Parlamentu Nasionál.

“Primeiru iha parlamentu, liuliu bankada CNRT sei haree lai, tuir prosedimentu ka lae, orsamentu ne’e tuir konstituisaun ka lae, depois maka ha’u haree, hodi haruka ba Tribunál, tanba halo orsamentu ne’e lalais, hanesan halo fali iha dalan de’it. Ne’e preokupasaun boot iha públiku,” José Ramos Horta informa ba jornalista sira bainhira partisipa serimónia loron Europa ne’ebé selebra iha Timor Plaza, sesta ne’e.

Razaun Ramos Horta husu fiskalizasaun abstratu Orsamentu Retifitikativu tanba aprovasaun no promulgasaun lalais liu, maibé proposta Governu aprezenta orsamentu ne’e ho karáter urjénsia entaun parlamentu aseita proposta ne’e.

Maske husu fiskalizasaun maibé iha tempu Prezidente Repúblika, Francisco Guterres ‘Lú Olo’ promulga ona orsamentu ne’e, no VIII Governu Konstituisionál fó-sai ona pozisaun katak, ezekusaun ba Orsamentu Retifikativu kontinua la’o.

Entretantu, Parlamentu Nasionál aprova proposta Orsamentu Retifikativu ho totál $1,241,210.748 iha finál globál ho votu a-favór 36, kontra 22 no abstensaun lima.

Enkuantu Proposta OR ne’ebé antes ne’e Governu aprezenta ho montante $1,129 maibé durante diskusaun espesialidade deputadu sira aprezenta tán proposta adisionál kuaze millaun $100-resin, nune’e proposta OR aumenta ba $1,241,210.748.

Ho aprovasaun OJE Retifikativu 2022 ne’e, lori mudansa iha dotasaun orsamentál, ezemplu, Reseita Globál Konsolidada sa’e ba $3,348,070.979 no Despeza Globál Konsolidada $3,347,457.179.

Orsamentu Órgaun no Servisu Administrasaun Sentrál hetan aumentu $1,241,210.747 no ninia totál agora sa’e ba $3,100,688.695, ne’ebé fahe tuir kategoria klasifikasaun ekonómika hanesan Transférensia Públika ho montante $1,950,982.687; Bens no Servisu ho montante $467,077.382; Kapitál Dezenvolvimentu $390,177.399; Saláriu no Vensimentu $250,537.130; no Kapitál Menór $41,914.097.

Jornalista   : Natalino Costa

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here