Aula tolu eskola nian ne'ebé inan-aman estudante sira kontribui harii ho voluntariu. Imajen Tatoli/Hortencio Sanchez

COVALIMA, 26 maiu 2022 (TATOLI)-Komunidade sira iha suku Suai Loro, postu administrativu Suai munisípiu Covalima, daudaun ne’e hulan de’it materiál konstrusaun ho distánsia kuaze killo-metru 2 hodi konstrui eskola bázika filiál Laen-Tolu, tanba la asesu ba estrada.

Koordenadór Eskola Bázika Filiál, Fernando António, hateten prosesu konstrusaun eskola ho sala tolu ne’e hahú implementa ona iha fulan-dezembru 2021 no sei tuir loloos remata iha maiu 2022 maibé  daudaun ne’e foin atinje pursentu 25 (%).

“Durante ami  halo konstrusaun EBF Laen-Tolu ami-nia difikuldade mak la iha estrada atu  transporte materiál to’o iha EBF, entaun  ami servisu hamutuk ho komunidade sira hulan de’it materiál konstrusaun,” nia informa Agência Tatoli, iha resintu EBC, Suai Loro, kinta ne’e.

Projetu komunitária ne’e gastu orsamentu jerál Estadu (OJE) 2021 nian ho montante  hamutuk $ 31.406, 60.

Maske projetu ne’e foin atinje pursentu kiik liu, maibé Koordenadór Eskola Bázika Filiál, Fernando António promete  sei esforsu hodi aselera prosesu konstrusaun ne’e hodi finaliza projetu ne’e iha fulan hirak tuirmai.

“Konstrasaun EBF Laen-Tolu,  traballadór mão de obra na’in-6 no selu traballadór ho diáriu ne’e dala ruma besik na’in 10 hodi selu kada loron $ 4.00,”nia esplika.

Eskola Bázika Filiál Laen-Tolu ho totál estudante hamutuk na’in-48 ho ninia professór permanente na’in ida no voluntáriu feto na’in rua.

Kona-ba prosesu aprendizazén oras ne’e kontinua la’o di’ak tanba estudante sira sei okupa hela edifisiu antigu ne’ebé harii ho materiál tradisionál hanesan uma kakuluk uza  kalen no didin bebak.

Entretantu,liuhosi OJE  tinan 2021, Munisípiu Covalima iha projetu komunitáriu hodi konstrui no reabilita eskola hamutuk 15 ho orsamentu  Milliaun $ 1.6.

 Jornalista: Celestina Teles

Editor: Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here