Prezidente Asosiasaun NGO Munisípiu Baucau, Augusto Pires. Imajen Tatoli/Natalino Belo.

BAUCAU, 25 maiu 2022 (TATOLI) – Sosiedade sivíl munisípiu Baucau konsidera implementasaun lei podér lokál no desentralizasaun administrativa sei hakbesik dezenvolvementu ba povu iha área rurál.

Prezidente Asosiasaun ONG Munisípiu Baucau, Augosto Pires, hateten, lei podér lokál no desentralizasun administrativa importante tanba hakbesik ukun ba povu ne’ebé durante ne’e nível nasionál difikulta prosesu administrasaun no dezenvolvimentu tanba governu sentrál susar atu kobre serbisu to’o área rurál.

“Desentralizasaun administrativa ne’e importante tebes tanba hakbesik ukun ba povu hodi halo atendimentu administrasaun no lori dezenvolvementu ba povu,” Prezidente Asosiasaun NGO Baucau informa ba Tatoli iha Vila Nova, kuarta ne’e.

Maibé antes atu implementasaun lei númeru 23/2021 kona-ba podér lokál no desentralizasaun administrativa iha munisípiu presiza iha perparasaun di’ak liuliu rekursu umamu hanesan lideransa kualidade.

Sosiedade sivil Baucau konsidera Baucau oan iha matenek barak no preparadu atu kumprimenta lei ne’e maibé presiza iha kritéria nune’e bainhira liuhosi eleisaun munisipál tuir lei númeru 22/2021, loron 4 novembru povu mak sei hili direita nune’e futuru mai bainhira prezidente autoridade munisipál eleitu labele kahur ho interese pesoál durante ukun munisípiu.

Sosiedade sivil husu atu Governu atu aselera proposta lei finanseira munisipál nune’e haruka ba Parlamentu Nasionál halo aprovasaun.

“Bainhira laiha osan, ha’u hanoin labele implementa, tanba ne’e hakarak atu aselera tenke aprova prosposta lei hodi fasilita preparasaun desentralizasaun munisipál,” Augosto argumenta.

Sosiedade sivil Baucau rasik iha komitmentu atu sai matan-tilun no prontu kolabora ho governu lokál no nasionál bainhira implementa lei podér lokál no desentralizasaun administrativa tanba durante ne’e sempre kontribui ba prosesu dezenvolvementu hanesan setór edukasaun sívika, agrikultura, juventude iha área rurál liuhosi orsamentu hosi doadór no governu Timor-Leste.

Setór inportante ne’ebé sei kontribui ba reseita governu munisipál mak hanesan turismu naturál tasi no foho, fatin istóriku no tursimu relijiozu ne’ebé sai primadona ba Baucau.

Nune’e mós setór agrikultura ne’ebé iha poténsia boot tanba iha natar kuaze kobre postu administrativu neen no Baucau sai sentru komérsiu ba sentru leste ne’ebé maioria emprezáriu barak mak halo atividade negósiu iha Baucau.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here