Caravela, Vemase, Baucau

VEMASSE, 24 maiu 2022 (TATOLI)–Loron ne’e la hanesan baibain. Iha Caravela, loromatan nia roman la konsege leno borus kalohan nia nakukun hosi tuku 11h45 to’o rai-nakaras. Anin huu buras halo rai-malirin. Basá, iha madrugada ne’e udan-rahun monu-tebar habokon rai-rahun.

Foho Birak hamriik-metin iha área sul (zona Caicua no Vemase) hafalun-metin ho abu-abu. Birak nia furak helik iha abu-abu sira-nia kotuk hamutuk ho anin-tasi no foho malirin, iha loron ne’e (tersa-feira).

Caravela besik estrada-boot (dalan-protokolu) maibé ita sei biban rona ai-knananuk hosi manufuik sira nian hanesan manu-tafui, manu-lin no seluktan, iha dadeer, meiu-dia no lorokraik tanba iha natar-luan ne’ebé abandona kle’ur ona tanba la iha irigasaun.

Iha natar-ninin, iha ai-laran tuan be luan ho ai-horis oioin fatin ba balada fuik no mós fatin ba haki’ak balada-maus sira hanesan karau, bibi-malae no timur. Iha ne’e, iha mós akar ne’ebé moris buras iha natar-laran sai ai-han ba fahi no animál sira seluk, ne’ebé furak no kmanek ho nia kadalak sira liubá tasi.

Loron ohin, loron importante ida ba sarani katólika iha mundu no iha Timor-Leste. Iha loron nee, selebra loron Maria Auxiliadora dos Cristãos-24 maiu, tuir tradisaun fiar katólika nian, nune’e kapela Caravela selebra mós loron ida-ne’e ho domin.

Iha 24 maiu, loron Maria Auxiliadora dos Cristãos nian, tuir kalendáriu liturjia ne’ebé responsável no sarani bairru nian, sei iha misa espesiál iha tuku 16h00 Oras Timor-Leste (Otl).

“Ukun iha família; iha domin, pás no responsabilidade. Espiritu haraik aan importante iha família,” Amu paróku Vemase, Pe. Filomeno Barreto hateten iha omília, hodi fó-hanoin ba inan-aman sira inklui sarani sira hodi kompara Maria, Jesus nia inan hatudu responsabilidade hodi buka tuir Jesus iha Galileia.

Iha biban ne’e, Nai-lulik ne’e hatoo mós kongratulasaun ba sarani sira hotu tanba iha 20 maiu komemora ona loron restaurasaun indepedénsia ho ‘pasífiku’. Nune’e, mós hein katak líder timor-oan sira bele ukun Timor-Leste ho didi’ak.

“Parabéns ba ita hotu ne’ebé komemora loron importante ne’e. Hein katak ita-nia nai-ulun sira ukun rai ne’e ho di’ak,” nia dehan.

Iha atividade litúrjika, Maria Auxiliadora dos Cristãos nian, kosok-oan na’in-31 (mane, feto) simu mós Sakramentu batizmu. Sai sidadaun kreda nian, sai fiar-na’in ba Kristu tuir fé Katólika nian.

Iha atividade ne’e, inan-aman sira kompromete hodi banati tuir evanjellu no hakribit sala.

Iha ámbitu loron Maria Sarani Sira Nia Tulun ne’e, Reprezentante autoridade lokál, André de Sá hateten katak, depois tinan rua resin tanba COVID-19, ikusmai, bele realiza fali misa hamutuk hodi komemora loron ‘sagradu’ ne’e.

“Ida-ne’e hanesan grasa ida, sarani sira, halibur malu fali,” nia hateten.

Koñese Caravela

Caravela nu’udar bairru ida lokaliza iha postu administrativu Vemase, munisípiu Baucau. Bairru ne’e lokaliza iha suku Vemase-Tasi, besik tasi-ibun ho altitude 5m iha nível tasi nian. Iha sikun nordeste Aldeia Lor, bele haree hetan Liran, Kisar no Wetar- Indonézia. Matan bele hetan mós peskadór sira hala’o peska ho sira-nia bero kiik-oan sira balabu iha tasi-laran be luan ‘hakmatek’.

Bairru ne’e, husi kosta norte, iha dalan-boot importante ba populasaun sira iha Baucau, Lospalos no Viqueque-munisípiu tolu lokaliza iha ponta leste nasaun nian. Dalan-boot ne’e halo ligasaun entre munisípiu tolu iha lorosa’e ho Dili, kapitál Timor-Leste.

Iha parte leste, oras ida ba sidade Baucau, iha zona Uailacama Aldeia Raha, nu’udar aldeia viziña. Iha dalan-boot entre Aldeia Raha no Caravela, iha dalan ida liu ba Uaisá no Caisido, suku Tirilolo, liuhusi Uaiwono, área besik tasi-ibun ho bee kristalina transparante no furak ho nia beleza naturál enkantadora (mempesona). Iha ponte Uai-cuha, pertense ba suku Bucoli, postu administrativu Baucau vila.

Iha zona osidentál, iha ponte Manuleden, minutu 15 antes Kampung Baru no Caicua no mós minutu 30 ba Sukaer-Laran no Vemase Vila-sentru urbana, molok liubá Laleia no Manatuto.

Iha Caravela, alende hetan ikan saboko fresku besik dalan-didin, hetan mós ponte-kais antigu ida, ne’ebé sei husik leet to’o ohin loron. Iha eskola primária públika ida, igreja katólika ida inklui semitériu públiku ida, lokaliza iha kruzamentu entre Caravela, Uaiwono no Uailacama, no mós merkadu tradisionál ‘abandonadu’ ida kumpleta ho sanita públiku rua.

Entretantu, Caravela ne’e integra iha aldeia Lor, suku Vemase vila. Líder másimu iha suku ne’e mak Sérgio Miguel Luis Freitas. Dialetu lokál hodi komunika loroloron ba malu mak Uaima’a (versaun Vemase).

Jornalista : Rafy Belo

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here