Hospitál Nasionál Guido Valadares (HNGV). Imajen Tatoli/Francisco Sony

DILI, 24 maiu 2022 (TATOLI)— Tuir dadus estatístika Hospitál Nasionál Guido Valadares (HNGV), durante janeiru too abríl, konsege fó tratamentu saúde ba veteranu na’in-2.137 hosi territóriu Timor-Leste.

Koordenadór Ekipa Saúde Veteranu iha HNGV, Eugénio Soares, hateten vetenaru sira mai konsulta iha HNGV hamutuk 2.137, hosi númeru ne’e maioria moras fuan,tensaun, raan midar,  rins, moras kankru , moras ruin  no seluk tan.

“Veteranu sira ne’ebé mak ita konsulta ne’e la’ós hotu-hotu, maibé balun ne’ebé mak moras baixa iha HNGV no balun konsluta externa hosi médiku sira,” Koordenadór Ekipa Saúde Veteranu HNGV ne’e hateten ba jornalista sira iha HNGV, tersa ne’e.

HNGV fó asisténsia saúde liuhosi Médiku Espesiálista sira ba Veteranu-sira ne’ebe dook hosi sentru saúde no balun hetan ona tratamentu, maibé kontinua konsulta.

“Durante fulan haat, ita halo transferénsia veteranu sira ba rai li’ur hamutuk-20 resin tanba sofre moras komplikadu no daudaun ita prosesa hela  dokumentu balun hosi veteran sira atu  tempu badak ba halo tratamentu saúde iha rai li’u,” nia akresenta.

Tuir planu, Minisitériu Saúde koopera ho HNGV atu halo tratamentu espesializada ba veteranu sira, iha loron 28 maiu hala’o iha Liquiça no iha loron 04 juñu hala’o iha Aileu. 

Konsulta matan

Iha biban hanesan, Xefe Unidade Oftamologia Hospiitál Nasionál Guido Valadares (HNGV) Vírgilo da Costa Pinto, hateten durante fulan janeiru too abríl pasiente sira mai konsulta matan iha Sentru Nasional Matan (SNM) 2.000-resin.

“Husi fulan janeiru too abríl pasiente sira mai konsulta matan hamutuk 2.000-resin, hosi númeru ne’e pasiente ne’ebé hetan problema iha matan na’in-942,” Xefe Unidade ne’e afirma.

Hosi janeiu too abríl sidadaun estranjeiru ne’ebé mak hala’o tratamentu  matan na’in- 42 no sira selu kada ema ida $25, maibé bainhira sira-nia matan katarata sira selu $250 hodi halo operasaun no ba sidadaun timoroan konsulta no halo operasaun gratuitu.

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here