Membru PNTL Bobonaro aruma sigarru marka 'Arow Black' ne'ebé unidade patrullamentu halo apreensaun. Imajen Tatoli/Sérgio da Cruz.

BOBONARO, 23 maiu 2022 (TATOLI) – Unidade Patrullamentu Fronteira (UPF) hosi kompañia Alfa Tunubibi, detein sidadaun feto ida tanba hatama sigarru ilegál ho pakote 240 hosi Atambua, munisípiu Belu, provínsia Nusa Tenggara Timur (NTT), Indonézia mai territóriu Timor-Leste.

Bazea ba rezultadu identifikasaun hosi seksaun investigasaun munisípiu Bobonaro, sidadaun ho inisál (VA) idade 36 estatutu kazál ne’e orijen hosi suku Saburai, postu administrativu Maliana, munisípiu Bobonaro.

Tuir kronolojia katak objetu hirak-ne’e (VA) sosa iha Atambua iha loron-domingu, 22 maiu 2022 ne’e lori kedas mai territóriu Bobonaro ho dalan ilegál, hosi fronteira terrestre suku Saburai, postu administrativu Maliana depois tula iha motorizada tolu ho objetivu atu distribui ba nia kliente sira iha merkadu.

Maibé asaun ilgál hirak-ne’e la konsege susesu tanba serbisu sekreta UPF no Servisu Informasaun Polísia (SIP) halo kedas intervensaun iha área Hospital tuan, suku Holsa, postu administrativu Maliana iha tuku 20:00 kalan oras Timor-Leste.

“Ohin dadeer UPF no forsa sira mai entrega objetu hirak-ne’e iha komandu mak hanesan sigarru naran ‘Arrow Black’  hamutuk karton tolu, slop karik hamutuk 240 ne’ebé  sira prende hatama hosi Saburai,” Komandante PNTL Munisípiu Bobonaro, Superintendente Antoninho Mauluta, informa ba jornalista sira, iha kna’ar-fatin segunda ne’e.

Superintendente ne’e subliña, daudaun ne’e parte seksaun investigasaun konklui ona prosesu identifikasaun ba sasán na’in no objetu hirak-ne’e asegura hela iha komandu PNTL Bobonaro hodi prepara submete ba prosesu investigasaun iha Ministériu Públiku.

Nia husu ba sidadaun sira hotu ne’ebé durante ne’e envolve iha atividade sira hanesan ne’e, ba oin tenke iha konsiénsia koopera ho polísia no forsa sira iha fronteira hodi prevene no minimiza atividade ilegál ne’ebé lei bandu.

“Importante liu mak liurai no xefe aldeia sira tenke tau matan ba ita-nia komunidade sira atu oinsá labele halo buat ne’e, tanba ilegál ne’e la’o ita lori de’it mak sasán mai, maibé bele mós ita lori moras hotu mai, oras ne’e moras COVID-19 sei la’o hela,” nia apela.

Enkuantu liuhosi prosesu identifikasaun suspeitu (VA) deklara ba autoridade seguransa katak nia parte hatene atividade ilegál lei bandu, maibé tanba nesesidade uma laran mak obriga tenke hola desizaun nune’e maske iha risku nia laran.

“Osan ne’e ha’u empresta ema-nia hamutuk $ 3000 dolar mak hodi halo bisnis, maun sira ami la halo hanesan ne’e, lori saida mak atu haan nia depois saida mak atu fó oan sira lori selu eskola,” nia informa ba polísia sira ho tanis.

Komandu PNTL munisípiu Bobonaro kontinua koordena servisu hamutuk ho UPF, Batallaun Orden Públiku (BOP) no Komandu Operasaun Espesiál (KOE) atu halo vijilánsia másimu iha área fronteira.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here