Ekipa téknika Empreza Malsam Savio Unipesoál, Lda, kee ona rai-kuak ba instalasaun semáforu foun iha Ponte Culuhun. Imájen Tatoli/Nelia Fernandes.

DILI, 23 maiu 2022 (TATOLI)—Diretór Dirasaun Nasionál Transporte no Terrestre (DNTT), António da Costa, informa prosesu instalasaun ba semáforu foun tolu (3) iha ponte Kuluhun, Audian iha parte Klinika Foho Osan Mean no iha Elemloi atinje ona 30%.

Notísia Relevante: DNTT planea sei instala tan semáforu tolu iha Dili

Ekipa téknika Empreza Malsam Savio Unipesoál, Lda, kee ona rai-kuak ba instalasaun semáforu foun iha Ponte Culuhun. Imájen Tatoli/Nelia Fernandes.

“Ligadu ho semáforu foun ne’ebé atu koloka iha ponte Kuluhun, Audian iha parte Klínika Foho Osan Mean no Elemloi, nia prosesu foin la’o to’o 30%. Ita-boot sira haree foin kee-rai hatama fiu, tanba sasán sira-ne’e hosi Indonézia ne’e kuandu mai ona, kompañia sira sei monta,” António da Costa hateten ba Agência Tatoli iha nia knar fatin, Dili, segunda ne’e.

Empreza sira ba sosa sasán iha Indonézia tanba ekipamentu ba semáforu iha Timor-Leste la faan. 

“Ekipamentu ba semáforu ita Timor la faan. Sasán sira-ne’e mai hosi li’ur, ne’ebé kompañia horibainhira mai kee hotu ona rai-kuak. Agora sira ba prepara sasán. Kuandu sasán mai ona, sira hela monta de’it ona,” nia dehan.

Empreza ne’ebé toma konta ba instalasaun semáforu foun tolu (3) ne’e mak Malsam Savio Unipesoál, Lda, ho durasaun kontratu fulan tolu (3).

“Ha’u espera katak, iha fulan juñu bele hotu. Maibé, depende ba sasán tanba sasán ne’e tenke transporta hosi ró no ró ne’e moos ita haree liuhosi laloran ne’ebé boot, no buat sira-ne’e hotu tenke tetu. Se sasán sosa iha ne’e karik, ha’u dehan semana ida bele hotu. Maibé, sasán mai hosi li’ur, ne’ebé depende ba empreza sira,” nia dehan.

Entretantu, tuir dadus hosi DNTT katak semáforu iha Dili laran hamutuk 12 ne’ebé kompostu hosi Bidau Lecidere, Estádiu Munusipál Dili, Ministériu Justisa, Eletrisidade de Timor-Leste E.P, Colmera, Katedrál, Jardim 05 de Maio, Palácio Prezidente, Timor-Plaza, Delta, Bidau Tokobaru no Bemori.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here