Prezidente INSS, Longuinhos Armando Leite. Imajen TATOLI/Egas Cristóvão

DILI, 23 maiu 2022 (TATOLI)—Prezidente Konsellu Administrasaun Institutu Seguransa Sosiál (INSS), Longuinhos Armando Leite, hateten to’o agora INSS rejistu empreza ho adezaun fakultativu hamutuk 1,815.

“To’o agora ita rejistu ona ita-nia empreza ho adezaun fakultativu hamutuk 1,815 no hosi númeru ne’e empreza hamutuk 442 no adezaun fakultativu 1,373,” Longuinhos Armando Leite hateten ba Agência TATOLI iha nia servisu fatin, Caicoli, Dili, segunda ne’e.

Nia hatutan, hosi númeru ne’e só ba ema-ne’ebé mak rejistu nanis ona iha INSS maibé rejistu foun laiha tanba sira-ne’ebé rejistu foun ne’e tenke rejista lai iha Segursansa Sosiál mak hafoin bele hetan apoiu.

“Sira foin rejistu ne’e tenke rejistu lai iha Seguransa Sosiál mak bele hetan apoiu ida-ne’e. Agora, apoiu ida-ne’e ba ema-ne’ebé rejistu nanis ona iha Seguransa Sosiál. Tanba apoiu ne’e fó ba ema ne’ebé rejistu ka tama ona iha Seguransa Sosiál la’ós fó fali ba foun para bainhira Governu atu fó ajuda mak sira mai rejistu, ne’e lae, maibé tenke integra ona iha Seguransa Sosiál,” nia hateten.

Tuir nia, apoiu ida-ne’e apoiu kontinuasaun hosi apoiu dahuluk ba subsidiu pandemia COVID-19 nian.

Entretantu, ba sira-ne’ebé rejistu ona iha Seguransa Sosiál no hetan ona apoiu iha faze dahuluk mak la halo kontribuisaun fulan-fulan ba iha Seguransa Sosiál mak nia sei lahetan apoiu.

“Ida-ne’e ami sei haree iha sistema, iha sistema mak la rejistu ami la transfere. Karik rejistu nanis ona maibé lahalo kontribuisaun mak ami sei la transfere osan ba nia. Se sira hakarak kontribui fali entaun INSS fó tempu nune’e sira bele hetan fali apoiu ne’e,” nia dehan.

Prezidente ne’e hateten, subsídiu ne’e maihosi pandemia COVID-19 nian ne’ebé mak atu halo rekuperasaun ba empreza no fakultativu sira.

“Ida-ne’e katak haree ba buat ne’ebé liu ona la’ós rekupera fali ba buat ne’ebé atu mai. Tanba ne’e, ha’u dehan impaktu ida liubá ne’e mak ita sei sente hela hodi nune’e ita loke rejsitu ba ema atu mai rejistu hodi bele hetan apoiu, nune’e bele rekupera fali ema ne’e nia moris,” nia dehan.

Fundu COVID-19 ne’ebé propoin kuaze millaun $47 no INSS selu ona milaun $7-resin ba entidade empreza no fakultativu sira hamutuk 15,775.

“Hosi osan ne’e, ita uza ona miliaun $7 resin hodi halo pagamentu ba benefisiáriu sira depois osan restu fó fila Estadu no agora Governu transfere fila-fali mai atu ami selu maibé ami rejistu hotu lai mak foin transfere,” nia dehan.

Rejistu ne’e hahú iha 06 maiu no sei taka iha 30 maiu 2022, depois prosesu fali mak hafoin deside halo pagamentu ne’e bainhira.

“Ita seidauk deisde bainhira mak halo pagmentu tanba buat ida verifikasaun ne’e mós presiza tempu hafoin finaliza,” nia dehan.

Jornalista : Osóra Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here