Komisaun Nasionál Juventude Katólika Timor-Leste realiza konferénsia imprensa kona-ba komemorasaun Jornada Mundiál Joventude iha Igreja Partikular sira, iha salaun Katedrál Dili, sábadu (21/05). Imajen Tatoli/Francisco Sony.

DILI, 21 maiu 2022 (TATOLI)—Konsellu Nasionál Juventude Katólika Timor-Leste (CNJCTL, sigla portugés), sábadu ne’e, lansa atividade Jornada Mundiál Juventude iha Igreja Partikulár (JMJIP) ne’ebé nu’udar oksziaun ida ba foinsa’e sira-nia sorumutu iha nivél mundiál.

Prezidente CNJVTL, Pe. João Soares, hateten Jornada Mundiál Juventude (JMJ) ka kuñesedu ho lian Inglés World Youth Day (WYD) nu’udar jornada peregrinasaun boot ida hosi sidade, nasaun, no kontinente hotu hodi ba to’o iha fatin destinadu, iha ne’ebá, foinsa’e hotu sei hasoru malu ho Santo Padre no foinsa’e sira seluk.

Prezidente Komisaun Nasionál Juventude Katólika Timor-Leste, Padre, João Soares. Imajen Tatoli/Francisco Sony.

“Pontu prinsipál iha Jornada Mundiál Juventude (JMJ) mak nu’udar “Festa Fiar” nian. JMJ jeralmente akontese tinan tolu dala ida, kada vez iha país ne’ebé diferensa ho presenza Santu Padre nian, nune’e ohin ofisialmente mós ha’u funsiona Komisaun Organizadora JMJIP nia servisu preparasaun sira hahú hosi tinan ne’e to’o tinan oin,” Padre João Soares hateten liuhosi konferénsia Imprensa ne’ebé realiza iha, Salaun Katedrál, Dili.

Kona-ba eventu JMJ ne’e, amu Papa Francisco hato’o pedidu ba igreja partikulár sira atu selebra Jornada Mundiál Juventude iha kada igreja partikulár ho razaun tanba foinsa’e balun ho difikuldade iha estudu, servisu ka finanseira, laiha posibilidade atu partisipa iha selebrasaun internasionál JMJ nian.

Tanba razaun ne’e mak di’ak tebes atu kada igreja partikulár oferese mós ba foinsa’e sira posibilidade ne’e, mezmu iha nivél lokal, maibé esperiénsia pesoál kona-ba “festa fiar” niq ne’e nu’udar okaziaun forte ida ba testemuñu, komuniaun no orasaun hanesan iha eventu internasionál JMJ nian.

Selebrasaun Jornada Mundiál Juventude iha igreja Partikulár iha nia signifikadu no valór la’ós de’it ba foinsa’e sira-ne’ebé hela iha rejiaun maibé ba komunidade eklesiál lokál hotu.

Hatan ba pedidu Amo Papa Francisco nian mak CNJCTL hato’o ba Konferénsia Episkopál Timorense (CET, sigla portugés) hodi hetan aprovasaun no autorizasaun ba eventu ne’e.

“Grasa Maromak nian, iha tinan ne’e, fulan abríl liuba, Bispu CET aprova ona liuhosi karta komunikadu ida ba CNJCTL atu organiza JMJIP no toma responsabilidade másimu ho kolaborasaun hosi Komisaun Juventude Diosezena sira.

Eventu JMJIP ne’e mos nu’udar pre-eventu ba Jornada Mundiál Juventude ne’ebe sei akontese iha Lisboa, Portugál, fulan agostu 2023.

Nune’e, JMJIP iha Timor sei realiza iha dia 25-30 abríl 2023 iha kapitál Dili. Partisipante sira mai hosi foinsa’e peregrinu Arkidioseze Dili, Dioseze Baucau, Maliana, Grupu Movimentu Juventude Katólica sira, Grupu Kategoriál sira, estudante ensinu sekundária no ensinu superiór sira ho totál partisipante besik hamutuk 1.000.

Iha Timor-Leste atividade prinsipál ne’ebé sei halo iha eventu JMJ ne’e mak hanesan, enkotru ho foinsa’e sira, formasaun umana, esprituál, no sei iha konfrerénsia mós hosi nai ulun sira, iha mós partilla esperénsia hosi foinsa’e sira no seluk tan.

Iha eventu ne’e, tuir planu, Konsellu Nasionál Juventude Katólika Timor-Leste (CNJCTL, sigla portugés) sei konvinda nai-ulun sira Timor-Leste atu partisipa.

Jornalista : Arminda Fonseca

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here