Prezidente Repúblika Portugal, Marcelo Rebelo de Sousa. Imajen Tatoli/Francisco Sony.

DILI, 19 maiu 2022 (TATOLI)—Prezidente Repúblika, Francisco Guterres Lú Olo, sei kondekora Prezidente Repúblika PortugálMarcelo Rebelo de Sousa, no Governadór-Jerál Austrália, David John Hurley, ho grau Grande Kolar.

Serimónia kondekorasaun ba Prezidente Repúblika, Marcelo Rebelo de Sousa, no Governadór-Jerál David John Hurley sei hala’o, kinta (19/05) ne’e, iha Palásiu Prezidensiál Nicolau Lobato, Bairru Pite, Dili.

“Prezidente Repúblika Portugés, Marcelo Rebelo de Sousa, nu’udar sidadaun mundu nian ne’ebé defende valór universál hanesan pás, liberdade no autodeterminasaun povu, liberdade espresaun, fraternidade entre povu hosi nasaun oioin no valór seluk ne’ebé sai komun ba timor-oan sira,” refere komunikadu imprensa ne’ebé Agência  Tatoli asesu hosi Palásiu Prezidensiál Nicolau Lobato, Bairru Pite, kinta ne’e.

Iha Dekretu Prezidente Repúblika númeru 28/2022, 18 maiu, hateten; “Iha tinan-20 Restaurasaun Independénsia domin ne’ebé Prezidente Marcelo Rebelo de Sousa sente ba Timor-Leste no husi Povu timorense halo há’u pessoalmente sente domin hosi timor-oan ba Portugál, ba portugés no Língua Portugeza.

Governadór-jerál Austrália nu’udar belun boot Timor-Leste nian, ligasaun atuál Governadór-Jerál Australia ho Timor-Leste hahú tiha ona molok Restaurasaun Independénsia.

David Hurley komanda Primeira Brigada iha 1999 no 2000 iha Darwin, apoiu operasaun lidera hosi Austrália iha Timor-Leste durante períodu ne’e.

Iha Dekretu Prezidente Repúblika númeru 29/2022, 18 maiu, hateten: “David Hurley, Governadór-jeral Austrália, desde 2019, kontinua guia nia komportamentu atu hasa’e sentidu Estadu ne’ebé karateriza, hametin relasaun amizade entre Estadu no Povu Timor-Leste no Austrália. Agora mak to’o ona momentu katak Repúblika Demokrátika de Timor-Leste no Povu Timorense rekoñese, ho gratidaun, papel ne’ebé dezenvolve hosi David Hurley”.

Orden Timor-Leste kria hosi Dekretu-Lei númeru 20/2009, 6 maiu, ho objetivu atu rekoñese no agradese nasionál no estranjeiru, tanba sira-nia komportamentu ka aktu ne’ebé sira prátika, iha kontributu signifikativu ba benefísiu país, timor-oan ka umanidade.

Orden Timor-Leste iha grau haat, ida mak Grande-Kolar no Grande-Kolar atribui eskluzivamente atu agracia (kondekorar) Xefe Estadu hosi país soberanu.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here