DILI, 19 maiu 2022 (TATOLI)—Prezidente Repúblika, Francisco Guterres Lú Olo, sei simu kondekorasaun Grande Colar da Ordem do Infante Dom Henrique hosi Prezidente Repúblika Portugál, Marcelo Rebelo de Sousa.
Serimónia kondekorasaun atribuisaun Grande-Colar da Ordem do Infante Dom Henrique sei hala’o iha Palásiu Prezidensiál Nicolau Lobato, iha 19 maiu 2022, iha tuku 18h00 lorokraik.
“Grande-Colar da Ordem do Infante Dom Henrique atribui ba sira ne’ebé hala’o serbisu relevante ba Portugál, iha País no estranjeiru, hanesan mós serbisu ba espansaun kultura portugeza ka ba koñesimentu Portugál nia istória no ninia valor sira,” refere komunikadu imprensa ne’ebé Agência Tatoli asesu, kinta ne’e.
Grande-Colar da Ordem do Infante Dom Henrique nu’udar grau Ordem ida-ne’ebé aas liu atribui hosi Prezidente Repúblika ba Xefe Estadu país estranjeiru.
Grande-Colar atribui mós hosi Prezidente Repúblika ba antigu Xefe Estadu ka ema sira-ne’ebé iha natureza estaordinária no relevánsia espesiál ho Portugál ne’ebé merese atu simu grau Ordem ida-ne’e.
Jornalista : Nelson de Sousa
Editór : Cancio Ximenes
