Komisaun Organizadora ba eventu SEA Games simu Jogadór selesaun nasionál U-23 Timor-Leste, bainhira hosi Malázia too iha aeroportu Vietname. Imajen/espesiál

VIETNAME, 18 maiu 2022 (TATOLI)— Hafoin derrota iha jogu SEA Games, Selesaun Nasionál U-23, kuarta ne’e, arranka fali ba Qatar hodi buka esperiénsia liuhosi jogu amigavél tuir kalendáriu Federation International Football Asosiation (FIFA) ne’ebé realiza iha fulan juñu.

“Jogu amigavél ne’e hanesan faze esperiénsia ida ba jogadór sira, programa ne’e planu tiha iha tinan kotuk bainhira atu arranka ba Singapura  iha jogu  The Asian Football Confederation (AFC) nian ne’e, maibé laiha posibilidade tanba tempu ne’e badak loos no tenta nafatin iha janeiru ne’e atu bá, maibé surtu omicron sa’e makas iha Qatar, nune’e aeroportu taka entaun agora mak foin iha posibilidade ba hala’o treinamentu iha ne’ebá,” Treinadór  Prinsipál Selesaun Nasionál U-23 Timor-Leste, Fabio Maciel da Silva hateten ba Agência TATOLI iha Vietname, kuarta ne’e.   

Notísia relevante: Nunka manán iha Sea Games, Timor-Leste sei kompleta jogu ikus ho Vietname            

Jogadór sira sei hela iha Qatar durante loron 12 atu hala’o treinamentu no konsumu hahán ne’ebé di’ak.

“Importante liuba ita nia jogadór sira, bele deskansa di’ak hamutuk iha fatin ida ho hahán ne’ebé iha nutrisaun di’ak, atu jogadór sira bele kompete iha jogu amigavél tuir data ne’ebé FIFA termina  hanesan jogu ida kontra Kamboja no jogu rua kontra Laos iha juñu nia laran,” nia dehan.

Totál jogadór ne’ebé atu arranka ona ba Qatar na’in 20,  kompostu hosi ofisiál na’in-ualu.

Tuir oráriu arranka hosi Aeroportu internasionál Hanoi iha tuku 19:30 oras Vietname nian no too iha Doha-Qatar iha tuku 22:50.

Ekipa selesaun nasionál Timor-Leste Under (U-23) obrigadu tenke elemina ona hosi Jogu Sudeste Aziátiku (SEA Games, sigla inglés), iha grupu A tanba lakon dala-haat tutuir malu iha jogu faze grupu.

Jogu Ikus liu, Timor-Leste termina jogu kontra ekipa uma-na’in, Vietname iha Estádiu Nasionál Vietname, iha domingu kalan ne’e, ho eskore ikus 0-2. Enkuantu kontra Filipina 0-4, Indonézia 1-4 no Myanmar 2-3.

Maski lakon, Timor-Leste hatudu jogu ho dignidade nu’udar timor-oan hodi reprezenta bandeira Repúblika Demokrátika Timor-Leste (RDTL) hodi joga tuir de’it regra saida mak iha ona.

Bainhira sai hanesan terseiru lugar iha kopa AFF, Timor-Leste konsege hatún nasaun jigante sira iha Ázia hanesan Brunei Darusalam, Kamboja no seluk tan.

SEA Games ba dala-31 tinan 2021, hala’o iha Hanoi, Vietname, hahú loron 12 to’o 23 maiu 2022.

Eventu multidesportivu ne’e, aprezenta kompetisaun hamutuk 526 hosi desportu hamutuk 40, ne’ebé antes ne’e Komisaun Organizadora hosi Komité Olímpiku Vietname halo ona evaluasaun no bazeia mós hosi regra Southeast Asian Games Federation (SEAGF).

Eventu ne’e partisipa hosi ema maizumenus 10.000, kompostu hosi atleta, ofisiál, delegasaun no mídia ne’ebé sei halo kobertura.

Notísia relevante: Ekipa futeból Timor-Leste termina jogu ho lakon kontra Vietname 0-2

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here