Prezidente Repúblika,Francisco Guterres Lú Olo. Imajen Tatoli/António Gonçalves.

DILI, 17 maiu 2022 (TATOLI)—Prezidente Repúblika, Francisco Guterres ‘Lú OLo’, husu deputadu sira iha Parlamentu Nasionál kinta lejislatura atu identifika lakuna ruma iha konstituisaun atu bele halo revizaun.

Notísia Relevante: Polítiku-na’in presiza refleta konstituisaun define objetivu Estadu lori povu moris di’ak

“Iha ha’u-nia diskursu hato’o katak bainhira iha semináriu ida-ne’e deskobre lakuna ne’ebé nota periódu atu bele halo revizaun ba konstituisaun liuhosi Parlamentu Nasionál iha kompeténsia rasik, atu halo hodi hadia di’ak liután,” PR Lú OLohateten ba jornalista sira hafoin abertura semináriu ho tema ‘’Por ocasião dos 20 anos da Constituição da República Democrática de Timor-Leste’’ ne’ebé organiza hosi Parlamentu Nasionál servisu hamutuk ho Universidade Nasionál Timor Lorosa’e (UNTL), iha edifísiu Ministéiru Finansa, Aitarak Laran, tersa ne’e.

Xefe Estadu ne’e hateten, atu halo revizaun ba konstituisaun presiza haree katak mateira balun ne’ebé iha konstituisaun ita labele book mak forma repúblikanu Estadu ninian, prinsípiu separasaun podér no ida seluk iha Estadu emerjénsia ne’e mós ita labele book.

Purtantu, atu revizaun ba konstituisaun tenke respeita prinsípiu matéria ne’ebé mak tau iha konstituisaun ho prinsípiu temporáriu nian katak ho tempu ne’ebé mak bele no ida-ne’ebé labele.

“Semi-prezidensilista iha konstituisaun nia substánsia mak ba separasaun podér hotu hodi labele iha podér absoluta órgaun ida-idak nian, nune’e presiza hanoin katak atu bele garante prinsípiu separasaun podér tenke iha duni,” nia hateten.

Tinan 20 kona-ba Timor-Leste nia konstituisaun rezumu iha aspeitu fundamentál rua ka tolu. Primeiru, direitu liberdade fundamentál sidadaun hotu sira-nian ne’ebé hodi hatuur Estadu direitu demokrátiku no sein direitu liberdade ema ida-idak ninian.

“Bainhira ita iha konstituisaun tenke iha duni ita-nia ema sira-ne’ebé iha direitu garantidu nia liberdade iha atu bele expresa, moris no la’o ba iha ne’ebe. Etaun, direitu liberdade no fundamentál sidadaun sai hanesan kestaun katak sai hanesan esénsia atu hatuur Estadu direitu demokrátiku,” nia esplika.

Segundu, Estadu direitu demokrátiku signifika uma organizasaun podér polítiku ne’ebé tuir ita-nia konstituisaun katak soberania rezide iha povu ka povu mak soberanu liu atu deside liuhosi eleisaun livre, demokrátiku, periódiku, pesoál atu bele lori nain-ulun sira atu exerse podér polítika.

Terseiru, exersísiu podér polítiku ida-ne’e tenke halo liuhosi prinsípiu separasaun poder entre órgaun soberania atu labele iha de’it órgaun ida mak komanda órgaun sira seluk hotu, maibé iha prinsípiu ida-ne’e konsagra interdepedénsia entre órgaun soberania sira katak tenke iha relasaun instituisional forte hodi nune’e Estadu ne’e bele la’o.

Prezidente Repúblika ne’e hateten, pontu dahaat mak sistema semi-prezidensialista ne’ebé hatuur iha prinsípiu separasaun podér katak laiha ema ida mesak de’it mak bele komanda, dalaruma ema hateten Prezidente Repúblika mak boot liu no tenke deside hotu, la’ós hanesan ne’e.

“Hanesan iha ha’u-nia diskursu hateten bainhira atu halo aktu disolusaun Parlamentu Nasionál ida-ne’e la’ós podér absoluta PR nian maibé podér ida relativu hatur iha konstituisaun katak bainhira iha situasaun sira-ne’ebé hanesan krize grave instituisionál ninian, iha ne’e mak PR bele uza nia kompeténsia atu halo disolusaun.

Vise Prezidente Parlamentu Nasionál, Maria Angelina Sarmento, hateten semináriu ne’e lori entidade importante hotu iha ita-nia sosiedade atu bele fó perspektiva no reflesaun ba ita kona-ba pasajen depois existénsia konstituisaun Repúblika Demokrátika Timor-Leste (KRDTL) to’o tinan 20 progresu to’o iha ne’ebé ho dezafiu saida de’it.

Ida-ne’e bele ajuda tebes ‘órgaun soberania Parlamentu Nasionál atu haree fali ninia papél importante iha faze ida-ne’e atu oinsá bele kompromete an hakruuk hala’o knar mandatu konstituisionál sira-ne’ebé hatuur iha konstituisaun.

Semináriu ne’e aprezenta hosi oradór dahuluk hanesan Diretór AJAR, José Luis Oliveira, Diretór CEPAD, João Boavida, Padre Júlio Crispim, Prezidente Konsellu Imprensa, Virgílio Guterres, Eis Deputada Assembleia Konstituiente, Lúcia Lobato hodi   aprezenta perspektiva sosiedade sivíl kona-ba konstituisaun-objetivu Estadu no dezenvolvimentu sosiedade timorense.

Oradór daruak, Juiza Konselleiru Tribunál Rekursu, Maria Natércia Gusmão Perreira, Provedoria Direitu Umanu no Justisa (PDHJ), Jesuina Maria, Asesór Jurídiku Prezidensia Repúblika, Jorge Graça no Dosente UNTL, Alexantre Corte Real de Araújo, hodi ko’alia kona-ba konstituisaun no konstrusaun demokrásia iha Timor-Leste ne’ebé la’o, dezafiu no futuru.

Jornalista : Nelson de Sousa

Editór       :  Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here