Alunu sira iha Eskola Bazika Filiál No.5 Comoro Dili, tuir ezame matéria Religião Morál ba terseiru períodu nian, iha Eskola Bazika Filiál númeru 05 Comoro, segunda (22/11). Imajen Tatoli/Francisco Sony

DILI, 17 maiu 2022 (TATOLI)—Ministru Edukasaun, Juventude no Desportu (MEJD), Armindo Maia, aprezenta projetu dekretu-lei, iha reuniaun Konsellu Ministru (KM), tersa ne’e, kona-ba medida apoiu estabelesimentu ba eskola sira, ne’ebé integra iha rede oferta servisu públiku ba asesu internet.

Aleinde ne’e, atribuisaun bolsa ba alunu sira ne’ebé di’ak liu no implementasaun projetu pilotu ‘eskola iha uma’ ka homeschooling inklui finansiamentu estudu viabilidade ba estabelesimentu eskola raiz.

“Diploma ne’ebé hetan ona ne’e, aprova estabelese apoiu ba asesu ba internet inklui kustu instalasaun no manutensaun ligasaun internet ba dosente no alunu, iha estabelesimentu ensinu báziku sentrál, sekundáriu jerál no tékniku vokasionál hamutuk 1.008, nune’e mós kustu ho tráfegu internet,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Notísia relevante: Governu aprova medida apoiu asesu internet ba ensinu superiór privadu

Nune’e mós, bolsa ba alunu ne’ebé konsiste iha atribuisaun valór pekuniária, ho montante determina hosi diploma ministeriál, ne’ebé dirije ba alunu hamutuk 5.837.

Aleinde ne’e, finansiamentu hosi projetu ‘eskola iha uma, destina atu hatán despeza rekrutamentu, kontratasaun no formasaun profesór sira, inklui akizisaun materiál didátiku-pedagójiku sira ho prosesu monitorizasaun no avaliasaun.

“Prevee katak projetu pilotu ne’e iha Dili, inklui kontratasaun ba profesór hamutuk 442, ne’ebé sei atua iha aldeia 222. Apoiu ida-ne’e inklui tan apoiu ba biblioteka móvel no ba formasaun profesór sira, ho estudu viabilidade ba estabelesimentu eskola raiz,” governante ne’e tenik.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here