Atleta hosi modalidade Boxe Timor-Leste, Delio Mouzinho, segunda ne’e, susesu iha nia jogu dahuluk kontra boxe hosi Malázia, nune’e iha direitu absoluta ultrapasa ba faze semi-finál iha kompetisaun SEA Games iha Vietname. imajen/espesial

VIETNAME, 17 maiu 2022 (TATOLI)– Boxista Timor-Leste, Delio Mouzinho, segunda ne’e, susesu iha nia jogu dahuluk tanba konsege halakon boxista hosi Malázia, nune’e iha direitu absoluta ultrapasa ba faze semi-finál hodi kontra Kamboja iha kompetisaun SEA Games iha Vietname.

Delio Mouzinho hanesan boxista ne’ebé ho klase layang seniór (69kg) ne’ebé prepara hosi Federasaun Boxe Amadora Timor-Leste (FBATL) atu kompete iha SEA Games.

Atleta hosi modalidade Boxe Timor-Leste, Delio Mouzinho, hasai foto hamutuk ho Boxista Malázia hafoin ramata jogu. Imajen/espesiál

Iha eventu SEA Games ne’e, Delio reforsa Timor-Leste liuhosi esforsu defende nia kareira hanesan boxista nasionál hodi halakon boxista Malázia ho númeru absoluta (sudut biru).

Maske iha jogu refere boxista Malázia mós tuku kona nia, maibé Delio nafatin lidera ho númeru absoluta, tanba konsege tuku Zep, Strip, Huk no Averkat barak liu ba boxista Malázia too ronde ramata.

“Ha’u sente orgullu tanba bele manán Malázia iha jogu dahuluk no agora prepara fali ba semi-final hasoru Kamboja, ha’u kontente tanba iha ita nia nasaun kondisaun ladun di’ak, maibé iha eventu ne’e ha’u konsege halo buat ruma,” Boxista Timor-oan ne’e hateten ba Agência TATOLI iha Vietname, tersa ne’e.

Nia dehan, loloos nia parte kompete iha kategória ka klase (69kg), maibé nia obriga-an kompete iha klase 75kg. Maibé kompete ho susesu hodi hatun duni atleta Malázia ne’e.

“Ha’u nia 69kg, loloos ne’e joga iha 69kg, maibé kriteria iha ne’e ami la too, nune’e ha’u fiar an joga de’it iha klase 75kg nian, maibé ho fiar-an no mentalidade di’ak ha’u hatun nia no avansa ba oin,” nia orgullu.

Atleta timór-oan ne’e hateten  maske kategoria la too, maibé ho forsa nafatin hodi kompete tanba reprezenta bandeira Timor-Leste  hodi la haree ba kategória, ho hanoin atu  hatudu ka hamorin Timor-Leste nia naran.

“Ha’u iha forsa nafatin atu kompete hodi hamorin ha’u nia nasaun nia naran, ha’u husu ba povu Timor -Leste hotu atu imi nia orasaun mai ha’u, ha’u bele joga hasoru Kamboja ho di’ak,” nia sujere.

Tuir oráriu Boxista Timór-oan ne’e sei kompete fali ho atleta hosi Komboja  iha semi-final  iha loron 20 maiu, iha Vietname.

Jornalista: Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here