Diretór Centro Nacional Chega! (CNC), Hugo Maria Fernandes, no Diretór Programa no ezekutivu Produser Casa Produsaun Audivisuál (CPA), Rui Nunes Muakandala, segunda (16/04) ne'e, selebra akordu kooperasaun prodús filme “desenhos animados” (kartun), kona-ba konteúdu relatóriu Chega. Imajen/Mídia CNC.

DILI, 16 maiu 2022 (TATOLI)—Centro Nacional Chega! (CNC) no Casa Produsaun Audivisuál (CPA), segunda ne’e, asina akordu kooperasaun prodús filme “desenhos animados” (kartun), kona-ba relatóriu Chega! versaun populár, ho objetivu atu estudante no públiku bele hatene liután kona-ba violasaun direitu umanu.

Diretór Centro Nacional Chega! (CNC), Hugo Maria Fernandes, no Diretór Programa no ezekutivu Produser Casa Produsaun Audivisuál (CPA), Rui Nunes Muakandala, segunda (16/04) ne’e, selebra akordu kooperasaun prodús filme “desenhos animados” (kartun), kona-ba konteúdu relatóriu Chega. Imajen/Mídia CNC.

“Iha relatóriu Chega! popular ne’e, nia halo rekomendasaun sira iha área edukasaun, ne’ebé komponente edukasaun barak, hanesan edukasaun formál no non-formál. Maibé, iha programa Oitavu Governu husu ba Centro Nacional Chega, atu oinsá mak introdús konteúdu relatóriu Chega iha kurríkulu ensinu. Entaun, ami halo ida ne’e hosi programa edukasaun formál ho Ministériu Edukasaun, maibé mós ami buka parseria ho parseriu sira ne’ebé bele apoiu CNC, liu-liu apoiu Governu nia programa atu halo fasil relatóriu Chega ne’e ema bele hatene,” Diretór Centro Nacional Chega (CNC), Hugo Maria Fernandes, hateten ba jornalista sira, hafoin asina akordu kooperasaun ho CPA, iha Balíde, Dili.

Iha tinan haat nia laran, CNC halo maneira oioin ho nível instituisaun oioin no hanoin katak, importante mós atu halo relatóriu ne’e sai fasil ba estudante sira. Entaun, parseria ho CPA ne’e CNC iha fiar ida katak ho produsaun vizuál, liuhosi filmazen ‘kartun’ ne’e bele tulun tebes estudante sira, liu-liu sira-ne’ebé eskola iha Ensinu Primária, Sekundária no Universitária sira atu bele hatene lolos saida mak relatóriu Chega ne’e nia konteúdu.

Tuir nia, kooperasaun ida-ne’e mós CNC akompaña ho téknologia dezenvolvimentu agora, tanba ema hotu kuaze uza smartfone, nune’e bele asesu iha ne’ebé no sá loron.

“Entaun, produsaun ne’e bele iha fonte oioin, liu-liu fonte avansa hosi ita-nia informasaun téknolojia halo ne’e, la’ós ema presiza mai iha biblioteka no aula laran maibé kuandu nia iha tempu livre nia bele asesu mós produsaun vizual ne’e liuhosi nia smartfone. Entaun, nia objetivu dahuluk maka CNC ho CPA iha objetivu komun ida katak, oinsá mak tulun ita-nia estudante sira, atu hatene liután relatóriu Chega,” nia dehan.

Daruak, halo relatóriu ne’e ho asesivel ho maneira ida-ne’ebé mak tempu agora ne’e nesesita loos atu ema ne’ebé laiha tempu atu ba biblioteka, maibé ho telefone iha nia liman, nia bele asesu informasaun liuhosi youtube iha ne’ebé de’it, mentaun ida-ne’e bele tulun tebes sosiedade sira.

Datoluk, filmazen “dezenhos Animados” (kartun) ne’e bele halo sosiedade sira, respeita liután direitu humanu, hatene liután sá mak Timor-Leste nia istória pasadu.

“Alende ne’e, sosiedade Timor nia iha ukun an mai hosi ne’ebé no oinsa mak ita-nia nai ulun sira, bele tau asuntu ne’e iha polítika ida, atu depois ita bele lori duni sosiedade ne’e respeita direitus humanus, hadomi dame no iha sensibilidade ba ema ho ema,” nia dehan.

Diretór Ezekutivu, Casa Produsaun Audivisuál (CPA), Rui Muakandala, agradese ba CNC tanba bele fó konfiansa ba CPA hodi prodús filmazen “desenhos animados” (kartun) kona-ba relatóriu Chega.

“Ita hotu hatene, oinsá CNC nia servisu inisiu ita hetan restaurasaun to’o agora. Prosesu ida-ne’ebé kle’an loos no prosesu ne’ebé ajuda timor-oan barak, liu-liu iha luta ba direitu humanu. CPA mós sente iha nia misaun kiik-oan sira-ne’e, CPA nia vizaun atu sai lian ba ema lian la’ek sira, hanesan mós luta ba direitu umanu. Entaun, ida-ne’e hanesan koinsidensia ida ba ita-nia parseiru, maibé koinsidensia ida-ne’ebé mak ita haree hodi fó valór boot ba ita oinsá la’o ba oin, oinsá atu hala’o ita idak-idak nia misaun,” nia hateten.

Entretantu, asina akordu kooperasaun prodús vídeo “desnhos animados” (kartun) ne’e durasaun fulan tolu (3) ho totál orsamentu hamutuk 6000-resin.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here