PNTL-PM halo simulasaun asegura bainaka espesiál

DILI, 14 maiu 2022 (TATOLI)– Polísia Nasionál Timor-Leste (PNTL) hamutuk ho Polísia Militár, sábadu ne’e hahú halo simulasaun hodi fó seguransa ba bainaka espesiál sira-ne’ebé sei partisipa iha serimonia investidura Prezidente Repúblika foun no komemorasaun loron restaurasaun independénsia ba dala-XX.

“Ita halo simulasaun ba membru Korpu Seguransa Pesoál (CSP, sigla portugés), oinsá eskolta ita-nia bainaka boot sira hanesan Verry Verry Important Person (VVIP) no Verry Important Person (VIP), ho didi’ak tuir padraun internasionál,”  Komandante Unidade Espesiál Polísia (UEP), Superientendente Xefe, Orlando Gomes, informa ba journalista sira hafoin simulasaun, iha aeroportu Comoro.

Parte PNTL liuhosi Unidade Espasiál Polísia (UEP) koloka efetivu CSP hamutuk 150 atu fó eskolta ba bainaka espesiál sira-ne’ebé sei partisipa iha serimónia investidura Prezidente Repúblika foun no selebrasaun restaurasaun independénsia ba dala-XX.

“Ita prepara efetivu 150 hosi membru CSP atu fó eskolta ba ita-nia alta entidade sira-ne’ebé maka atu mai ita-nia rai tuir komandu operasaun nian,” Superientendente Xefe Orlando Gomes hateten.  

“Tuir oientasaun no planu ne’ebé maka Komandu PNTL liuhosi Komandante Operasaun Nasionál enkontru hamutuk parte komisaun organizadora, katak konvidadu sira hanesan Xefe Estadu ne’e sei hetan eskolta hosi Polísia Militár, enkuantu konvidadu sira hosi nível Xefe Governu no tún mai ne’e Polísia Nasionál Timor-Leste nia responsablidade,” nia katak.

Tuir observasun TATOLI iha terrenu nota, PNTL hamutuk ho Polísia Militár (PM), halo simulasaun iha aeroportu internasionál Nicolau Lobato, Comoro,  komandante sira orienta membru CSP no PM oinsá atu fó seguransa ba alta entidade ida hosi aviaun laran to’o lori konvidadu importante sira ne’e ba otél ho seguru.

Jornalista   : Natalino Costa

Editór         : Evaristo Soares Martins