Ekipa Selesaun Nasionál Timor-Leste U-23. imajen/Hortencio Sanchez

VIETNAME, 14 maiu 2022 (TATOLI) – Ekipa Timor – Leste “Lafaek” hosi selesaun nasionál U-23 nunka manán iha Sea Games époka 2022, nune’e aban iha estádiu nasional Vietname sei termina jogu ikus ho ekipa uma-na’in hanesan kompleta de’it jogu.

Jogu ne’ebé Timor – Leste sei hasoru ho Vietname lakon mós sei la tama ba faze kuartu finál, manán mós sei la tama tanba ekipa seluk hanesan Myanmar, Filipina, Indonézia no Vietname pontu dook ona kompara ho Timor-Leste ne’ebé sei zero iha tabela klasifikasaun.

Treinadór prinsipal Fabio Maciel da Silva, hateten, jogu ikus ne’e hanesan kompleta de’it jogu tanba pontu la to’o ho ekipa seluk maibé sei esforsu nafatin atu bele manán jogu.

“Ita hatene Vietname ekipa ida-ne’ebé forte, agora nia mak ekipa ne’ebé kualifikadu avansa ba kuartu finál, maibé ita sei hatudu nafatin jogu, maske sira ekipa ne’ebé di’akliu iha grupu A,” dehan Fabio ba Agência TATOLI iha Vietname, sábadu ne’e.

Maski nune’e, nia nafatin iha esperansa ba ekipa ne’ebé nia lidera atu hatudu jogu ne’ebé di’ak.

“Aban, ita-nia ekipa sei hatudu jogu, ha’u tenta jogadór sira tenke halo kontra no atake ne’ebé maka’as maski jogu ne’e kompleta de’it,” nia dehan.

Jogu aban sei la inklui Timor – Leste nia avansadu prinsipál ne’ebé durante ne’e oferese golu ba Timor – Leste, Mouzinho Barreto de Lima (10) tanba iha jogu rua tuituir malu kontra Myanmar no Indonézia nia komete erru no hetan ona kartaun kinur.

“Mouzinho avansadu ida-ne’ebé importante ba ita-nia ekipa maibé nia sei labele joga iha aban tanba hetan kartaun kinur dala rua tuituir malu, maibé ha’u sei tenta oinsá ho jogadór sira seluk bele troka nia fatin,” treinadór Brazilleru ne’e haktuir.

Iha Sea Games tinan ne’e, Timor – Leste nunka manán iha jogu tolu tuituir malu hanesan, lakon ho Filipina 0-4, Indonézia 1-4 no Myanmar 2-3.

“Ami nafatin fuan boot hodi simu saida de’it mak akontese, maibé iha jogu aban ami sei esforsu aan nafatin atu manán netik, maibé minute 90 iha kampu laran mak sei termina, hanesan kapitaun, ha’u nafatin fó korajen ba jogadór hotu atu joga ho vontade ne’ebé di’ak,” Kapitaun Filomeno Junior da Costa espresa.

Jornalista   : Hortencio Sanchez

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here