Kaderneta Eskolár. Imajen/Espesiál

DILI, 12 maiu 2022 (TATOLI)–Gabinete Avaliasaun no Dezenvolvimentu Kurrikulár (GADK) hosi Ministériu Edukasaun Juventude no Desportu (MEJD), semana ne’e sei hala’o prosesu impresaun kaderneta eskolár foun ba estudante 200.000 resin iha ensinu báziku primeiru no segundu siklu.

“Ha’u fiar semana ne’e hafoin liu tiha loron 20 maiu, ami bele hahú ona halo impresaun kaderneta eskolár ba estudante primeiru no segundu siklu maibé tuir faze, tanba númeru kaderneta boot tebes bele dehan hahú hosi 150.000 to’o 200.000 resin, ne’ebé impresaun ne’e sei la halo dala ida maibé ami sei buka identifika kada faze atu prodús hira uluk,” Koordenadór Avaliasaun no Dezenvolvimentu Kurrikulár, Mateus dos Reis, iha Vila Verde, kinta ne’e.

Notísia relevanteMEJD sei introdús kaderneta eskolár foun ba nível ensinu báziku

Tuir Koordenadór, hafoin asume responsabilidade, esforsu ne’ebé nia halo maka buka atu halo re-formulasaun kaderneta eskolár ba estudante sira iha primeiru to’o sestu anu, ne’ebé bele dehan hosi primeiru to’o segundu siklu, tanba GADK haree kaderneta ba estudante ne’e prejudika liu estudante sira iha ensinu báziku ne’e.

“Ita haree hosi primeiru to’o terseiru siklu estudante ida iha kedan kaderneta haat, primeiru siklu kaderneta rua, segundu siklu kaderneta ida no terseiru siklu kaderneta ida. Ami hakarak halo re-formulasaun uluk ba kaderneta primeiru no segundu siklu nian atu estudante ida hetan kaderneta ida de’it, atu nune’e labele prejudika labarik sira,” nia tenik.

Maibé, planu re-formulasaun kaderneta eskolár ne’e sei hahú uluk hosi estudante primeiru no segundu siklu, tanba hetan ona apoiu hosi profesór sira iha territóriu nasionál, bainhira GADK ba halo konsultasaun iha eskola sira.

Hosi konsultasaun ne’e reprezentante profesór sira hosi kada Munisípiu fó sira ninia hanoin hakarak halo re-vizaun ba kaderneta eskolár tuir planu ne’ebé GADK aprezenta, tanba ne’e GADK aprezenta ona polítika ne’e ba MEJD no planu ne’e rasik hetan apoiu hosi superiór edukasaun ne’e, ne’ebé hein de’it despaixu Ministru nian atu hahú halo ona impresaun.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here