Ministru Edukasaun Juventude no Desportu, Armindo Maia, inaugura instalasaun bee-moos iha EBF Wetalik Viqueque, kinta (12/05). Imajen Tatoli/Vitorino Lopes da Costa

VIQUEQUE, 12 maiu 2022 (TATOLI)–Ministru Edukasaun Juventude no Desportu (MEJD), Armindo Maia, kinta ne’e, inaugura bee-moos ba Eskola Ensinu Báziku Filiál (EBF) Wetalik, iha aldeia Wakae, suku Uma Uain Kraik, postu Viqueque vila, munisípiu Viqueque.

“Instalasaun bee ba eskola ne’e uza osan ho naran fundu kiik, nune’e ohin ita haree no inaugura bee-moos ba eskola Wetalik hodi estudante sira uza fase liman molok tama ba aula prezensiál,” Ministru Edukasaun Juventude no Desportu, Armindo Maia, hateten liuhosi ninia diskursu iha Eskola EBF Wetalik, kinta ne’e.

Profesór no autoridade lokál sira konsege uza osan hamutuk $745 sosa paralon, sanyo, tanki no geradór hodi mai  dada to’o iha edifísiu eskola.

“Eskola Wetalik uza fundu kiik, maibé imi konsege dada bee mai eskola hodi kria kondisaun, enkuantu ema balun uza osan $4.000 to’o 3.000 dala ruma la dada bee karik, maibé eskola Wetalik konsege dada. Tanba ne’e, maka agradese ba eskola tanba imi konsege jere fundu ho di’ak,” nia akresenta.

Notísia relevante: BTL, E.P kontrata kompañia Lia-lura dada bee-moos ba komunidade Bualale Baucau

MEJD hetan fundu apoiu hosi parseiru sira iha ámbitu COVID-19 hodi rezolve fasilidade edukasaun.

“Fundu ne’e mosu tanba atu prevene moras COVID-19, ne’ebé tenke uza máskara no fase liman ho sabaun. Maibé, ha’u ba vizita eskola balun, profesór sira dehan atu fase liman maibé bee laiha. Entaun inisiativa ida maka hamosu fundu kiik hodi dada bee no sosa tanke tanba iha eskola Wetalik mós sosa jeneratór ida, signifika eskola iha duni inisiativa hodi uza fundu ida-ne’e,” nia tenik.

Osan ne’ebé simu iha fevereiru 2022 hodi implementa programa dada bee-moos iha Eskola EBF Wetalik.

Tuir dadus, estudante EBF Wetalik hamutuk na’in-145, profesór permanente na’in-haat no voluntáriu na’in-rua. 

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here