Papa Francisco (liman karuk) no saserdote Musulmanu Al Azhar Ahmed al-Tayeb (liman kuana) asina Deklarasaun Abu Dhabi, mak dokumentu ida kona-ba fraternidade umana ba pás mundiál no moris hamutuk, iha Sorumutu Amizade Umana iha Uni Emirat Arab, segunda (04 fevereiru 2019). (Human Fraternity Meeting)

DILI, 12 maiu 2022 (TATOLI)—Prezidente Parlamentu Nasionál, Aniceto Longuinhos Guterres Lopes, hala’o sorumutu ho PR eleitu ko’alia oinsá PN aprova rezolusaun atu Timor-Leste adota deklarasaun pás mundiál kona-ba fraternidade umana no moris hamutuk, hosi dokumentu ne’ebé Amu Papa Francisco hasai. 

“Ha’u mak husu enkontru ho Prezidente Parlamentu Nasionál hodi haree fila-fali kestaun deklarasaun kona-ba fraternidade umana ne’ebé inisiativa hosi Santidade Amu Papa Francisco ho saserdote musulmanu Al-Azhar halo dokumentu ne’ebé asina iha Abu Dabi, 04 fevereiru 2019. Ne’ebé, importante atu adopta iha Timor-Leste,” Ramos Horta hateten ba jornalista sira hafoin ramata enkontru iha Gabinente Prezidente Parlamentu Nasionál, kinta ne’e.

Iha dokumentu ne’e husu apelu ba Governu atu adopta nu’udar dokumentu nasionál hodi bele tama iha kuríkulu eskola nian hodi eduka ka sensiviliza atu inspira estudante no joven ho sosiedade tomak, tanba buat ida importante tebes atu hametin dame rai sira no iha mundu fraternidade umana.

Iha tinan kotuk, dokumentu ne’e Asembleia Organizasaun Nasaun Unida (ONU) halo tiha ona rezolusaun ida atu sai hanesan loron mundiál.

Laureadu Prémiu Nobel da Pás ne’e ko’alia ho Prezidente Parlamentu Nasiobál no antes ne’e mós ho lidér nasionál sira seluk.

“Ha’u ko’alia ho Prezidente Parlamentu no mós antes ne’e ho Sekretáriu Jerál Partidu Fretilin Mari Alkatiri, Primeiru-Ministru Taur Matan Ruak, Prezidente Repúblika Francisco Guterres Lú Olo, Xanana Gusmão hotu-hotu konkorda no Timor-Leste bele adopta dokumentu ne’e,” nia hateten.

Sorumutu ho Prezidente Parlamentu ne’e atu haree oinsá prosesu ne’e iha Parlamentu Nasionál, bankada sira hotu konkorda nune’e prepara ona rezolusaun ida no ohin duni plenária bele aprova.

Prezidente Repúblika eleitu ne’e hateten, ida ne’e signifika Timor-Leste sai nasaun primeiru iha mundu ne’ebé Parlamentu Nasionál no Estadu adopta dokumentu refere sai ofisiál hafoin tuir kanál Governu nian haruka ba Ministéiru Edukasaun hahú tama iha kuríkulu eskolár.

Iha fatin hanesan, Prezidente Parlamentu Nasionál, Aniceto Guterres, hateten PN ajenda ona iha kinta ne’e (12/04/21) sei realiza reuniaun plenária extraordinária ba diskusaun no votasaun projetu rezolusaun PN númeru 93/V(4a), kona-ba pás mundiál, fraternidade umana no koexisténsia komun.

Jornalista : Nelson de Sousa

Editór       : Cancio Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here