Ministra Saude hamutuk Embaixador Xina iha TL no Reprezentante WFP Foto hamutuk ho benefisiariu ai-han Super Cereal ba inan isin rua no inan fo susu. Imajen/Joanico Araujo

METINARO, 11 maiu 2022 (TATOLI)— Ministériu Saúde hamutuk ho Programa Ai-han Mundiál (PAM), kuarta ne’e, distribui Super Cereal, ai-han fortifikadu riku ho vitamina no mineral ba grupu vulneravel sira ne’ebé sofre má nutrisaun  ha Postu Administrativu Metinaro, munisípiu Dili.

Super Cereal hamutuk tonelada 535 mak sosa ho fundu husi kontribuisaun Governu Xina no sei distribui ba inan isin-rua no inan fó susu iha munisipiu 13, inklui Rejiaun Espesiál Administrativa Oé-cusse no Ambeno (RAEOA). Distribuisaun ai-han suplementu refere sei la’o durante períodu fulan-haat nia laran no ho apoia fundu ne’ebé iha asegura tiha ona ai-han suplementu refere ba períodu tinan ida.      

Biban ne’e, Ministra Sáude, Odete Maria Freitas Belo, hateten akordu kontribuisaun entre Governu Repúblika Popular Xina no WFP konabá asisténsia ai-han ba Repúblika Demokrátika Timor-Leste mai iha tempu ne’ebé loos tanba komunidade barak mak enfrenta hela difikuldade ba nesesidade ai-han. Tanba impaktu husi pandemia no dezastre naturál hanesan siklone seroja akontese tinan kotuk.

“Tanba ne’e, hodi Governu Timor-Leste nia naran, ha’u hakarak hato’o agradese wa’in ba Governu Xina ba jenorosidade no apoiu umanitarizmu,” Ministra Saúde hateten iha  serimónia lansamentu Super Cereal iha Sentru Saúde Metinaro, Dili.

Iha Timor-Leste, problema seguransa ai-han no malnutrisaun kontinua sai dezafiu bo’ot, populasaun liu 1/3 mak sofre ba inseguransa ai-han. Labarik tinan 5 mai kraik hamutuk 47% mak nia altura la tuir nia idade, no isin ki’ik ka menus todan hamutuk 32%, no 38% hosi inan ho idade reprodutiva (tinan 15-49) maka sofre ba anemia.

Nune’e, distribuisaun ne’ebé ohin lansa, ne’e hanesan parte husi WFP nia programa ai-han suplementu atu kombate malnutrisaun.

Iha biban hanesan, Embaixadór Xina ba Timor-Leste, Xiao Jianguo, hateten Xina iha relasaun di’ak tebes ho WFP atu fó asisténsia umanitaria  tanba nu’udar prioridade ida mós.

“Ho inundasaun ne’ebé akontese tinan kotuk iha fulan Abril no impaktu atuál husi krize ai-han globál difikulta tebes inan isin-rua no inan fó susu sira atu asesu ba ai-han nutritivu ne’ebé adekuadu iha Timor-Leste,” Embaixadór Xina  hateten.

Nia dehan: “Ho kontribuisaun ida ne’e, espera ita bele hadi’a feto no família sira nia moris. Alende fó asisténsia nutrisaun ba inan isin-rua no inan fó susu, Xina mós servisu hamutuk ho WFP hodi hadi’a infrastrutura atu asegura preparasaun merenda eskolár ne’ebé ijieniku no seguru ba estudante sira.”

Ho impaktu globál husi folin sasán sa’e, lakuna seguransa ai-han no nutrisaun iha Timor-Leste aumenta boot. Bazeia ba rezultadu asesmentu sósiu-ekonomia ne’ebé relata husi Governu Timor-Leste hatudu katak uma kain hamutuk 38% mak redús kualidade dieta nutritivo, no ema kbiit laek sira balun la konsege han pelumenus loron ida dala tolu, tanba menus rendimentu no rekursu.

Entretantu, Reprezentante WFP iha Timor-Leste, Dageng Liu, hateten konflitu iha Ukránia aumenta tan presaun hodi kauza folin sasán sa’e globalmente, no situasaun ida ne’e ezije ema nia abilidade atu asesu ai-han ne’ebé adekuadu.

“Onra boot ba ami servisu hamutuk ho Ministériu Saúde hodi fó asisténsia ai-han nutritivu ba ema vulneravel sira iha tempu ne’ebé sira presiza tebes.  Ami mós hato’o obrigadu ba Governu Xina ba fundu ne’ebé mai iha tempu loos no absolutamente kritiku hodi sustenta no responde ba misaun salva moris iha nasaun ida ne’e.” nia afirma.

Programa Ai-han Mundiál Nasaun Unida (WFP) hetan prémiu Nobel da Paz tinan 2020.  Tanba WFP mak organizasaun umanitáriu bo’ot liu iha mundu, salva moris iha situasaun emerjénsia no harii prosperidade no suporta futuru ida sustentável ba ema hirak ne’ebé rekupera husi konflitu, dezastre no impaktu husi mudansa klimátika.

Jornalista: Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here