Osan Dollar Amerikanu. Imajen/Espesiál

DILI, 11 maiu 2022 (TATOLI)–Banku Sentrál Timor-Leste (BCTL, sigla portugés) lansa relatóriu trimestrál Fundu Petrolíferu Timór-Leste, ne’ebé termina iha loron 31 marsu 2022, aprezenta montante biliaun $19,12, enkuantu iha trimestre antes ne’e ho montante biliaun $19,65.

Relatóriu ne’e hatudu katak totál reseita ne’ebé simu iha trimestre ne’e hamutuk millaun $533,45, kompostu hosi kontribuisaun kontribuinte sira ba fundu hamutuk millaun $145,32 no pagamentu royalty ne’ebé simu hosi Autoridade Nasionál Petróleu no Minerál (ANPM) millaun $388,13 no anuál pipeline fee mak millaun $4,08.

Enkuantu, rendimentu hosi investimentu fundu hamutuk millaun -$904,34, kompostu hosi kupaun no dividendu ne’ebé simu mak millaun $66,58, ho mudansa iha valór merkadu millaun -$971,76 no movimentu kambiais millaun $0,836 iha trimestre ne’e.

“Kondisaun ne’e rezulta rendimentu ba karteira fundu nian durante trimestre ne’e -4,15% enkuantu rendimentu sasukat ka benchmark nian ba períodu ne’e mak -4,23%,” refere nota ne’ebé Agência Tatoli asesu, kuarta ne’e.

Notísia relevante: Kapitál fundu petrolíferu iha trimestre ikus biliaun $19,65

Lei Fundu Petrolíferu nian espesifika katak Jestór Operasionál BCTL mak hanesan ajente responsável ba jestaun operasionál Fundu Petrolíferu, ne’ebé Ministériu Finansa (MF) mak responsabliza atu estabelese estratejia investimentu tomak kona-ba fundu nian.

BCTL jere ona portofoliu besik liu ho pontu referénsia iha trimestre dala-67 dahuluk, ne’ebé diferénsia entre portofoliu no pontu referénsia iha períodu ne’e, ho pontu ualu baze 0,08%.

“Dezempeñu absoluta retornu fundu hahú hosi inísiu mak 4,5%, ne’ebé pontu importante hosi relatóriu trimestre ba dala-LXII, kobre períudu 01 janeiru to’o 31 marsu 2022, inklui kapitál fundu biliaun $19,12, ne’ebé osan kontadu brutu fundu nian tama hosi kontribuisaun kontribuinte no royalty  hamutuk millaun $533,45,” esplika nota hosi BCTL.

Nune’e, osan kontadu líquidu ne’ebé sai hosi fundu durante trimestre ne’e hamutuk millaun $154,08, kompostu hosi millaun $150 transfere ba Orsamentu Estadu no millaun $4,08 kobre kustu jestaun nian.

Rendimentu portofoliu instrumentu merkadu finanseiru iha períodu ne’e mak -4,15%, kompara ho rendimentu referénsia mak -4,23%.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here