Pinta Estrada. Imajen/Espesiál.

DILI, 11 maiu 2022 (TATOLI)—Diretór Dirasaun Nasionál Transporte no Terrestre (DNTT), António da Costa, informa DNTT prevee orsamentu hamutuk $722,045.03 ba realizasaun pinta estrada iha kapitál Dili.

“Ita aloka osan hamutuk $722,045.03 ba pinta estrada iha kapitál Dili,” António da Costa, hateten ba Agência Tatoli, iha nia knar fatin, Dili, kuarta ne’e.

Nia informa, kompañia ne’ebé manan konkursu ba pinta estrada ne’e mak Empreza Hedge Unipesoál, Lda, no empreza hahú hala’o ninia atividade pinta estrada ne’e iha 04 abríl tanba 03 abríl ne’e sira halo teste pinta estrada iha área Comoro, nune’e iha 04 abríl mai teste fali iha Hotel Arbiru, hafoin ne’e empreza kontinua pinta kedas estrada.

Pinta estrada ne’e agora konklui ona, falta de’it área Balide no Hudi Laran maibé iha dalan ninin sira-ne’e kuaze dada besik hotu ona.

Aleinde ne’e, Dirasaun ba Cristo Rei no Dirasaun Kuluhun ba Hera mós Empreza sira seidauk pinta, maibé iha dalan protokolu ba Lahane Nobre, sira pinta ona.

“Tanba ne’e, nia progresu agora ita-boot sira haree, iha Dili laran kuandu marka iha ona nia prosesu mak ne’e,” nia dehan.

Kona-ba tinta, Diretór DNTT ne’e akresenta, tinta ne’e empreza sira sosa fali hosi Malázia.

“Prosesu sosa tinta mak kle’ur nune’e, tanba ne’e sira esforsu karik iha fulan juñu nia laran, sira pinta bele ramata. Sira-nia servisu komesa 09h00 kalan ba leten tanba ita-nia karreta motor iha Dili laran lubuk no rame demais, entaun sira tenke foti desizaun katak 09h00 kalan ba leten mak pinta, ami-nia tékniku sira mak akompaña,” nia dehan.

Tanba, ligadu ho komemorasaun loron restaurasaun independénsia ba dala-XX (20 maiu 2022-20 maiu 2022) no serimónia investidura Prezidente Repúblika eleitu períodu 2022-2027, José Ramos Horta, ne’e DNTT foka uluk ba iha dalan protokolu no dalan protokolu hotu ona mak empreza ne’e hahú fali ba dala ninin sira.

“Pinta ne’e depende ba sira (empreza) nia esforsu, maibé ha’u garantia katak, juñu nia laran bele finaliza ona, tanba agora ita haree hela oituan de’it,” nia katak.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here