iklan

DILI, HEADLINE, POLÍTIKA

PN aprova adisionál millaun $2,5 ba MAKLN haloot restu mortál

PN aprova adisionál millaun $2,5 ba MAKLN haloot restu mortál

Restu mortál iha osoáriu, suku Odomau, postu administrativu Maliana, munisípiu Bobonaro. Imajen TATOLI/Sérgio da Cruz

DILI, 11 maiu 2022 (TATOLI)—Reprezentante povu iha uma fukun Parlamentu Nasionál liuhosi diskusaun debate espesialidade aprova proposta Orsamentu Retifikativu adisionál millaun $2,5 ba Ministériu Asuntu Kombatente Libertasaun Nasionál (MAKLN) hodi kontinua haloot restu mortál iha territóriu nasionál.

“Rezultadu votasaun ba proposta númeru 1a ho votu a-favór 37, kontra 20, abstensaun lima, nune’e proposta orsamentu adisionál ne’ebé aprezenta hosi proponente sira ba MAKLN aprovadu,” Prezidente Parlamentu Nasionál, Aniceto Longuinhos Guterres Lopes, deklara iha plenária durante diskusaun debate proposta Orsamentu Retifikativu iha faze espesialidade loron dahuluk, tersa ne’e.

Deputadu proponente PLP Francisco de Vasconselos, Deputadu Fretilin Fabião de Oliveira no Deputada KHUNTO Olinda Guterres inísia proposta númeru 1a títulu servisu Ministériu Asuntu Kombatente Libertasaun Nasionál (MAKLN) husu adisionál millaun $2,5 hodi rekolla restu mortal sira iha ne’ebé daudaun ne’e hatuur hela iha Osoáriu.  

“Proposta ida-ne’e mosu tanba tinan barak ona mate ruin barak hosi ita-nia erói sira tau iha fatin-fatin iha munisípiu hotu, balun haloot ona no balun seidauk haloot, nune’e presiza hodi dignifika,” Deputadu Vasconcelos fundamenta.

Ministru Asuntu Kombatente Libertasaun Nasionál (MAKLN), Meta Mali, hateten iha Aileu restu mortál ne’ebé hatuur hela iha jardin erói hamutuk 79, Manufahi 33, Covalima 772, Ainaro 2556, Baucau 980, Manatuto 1819, Viqueque 836, Lautém 157, Ermera 1500, Liquiça 30, Bobonaro 671 no Metinaro neen (6).

Ho volume sira-ne’e hotu mak agradese ba proponente hato’o ona proposta no Orsamentu Retifikadu natón atu bele ezekuta iha tempu ne’ebé limitadu durante mandatu ne’e.

Enkuantu PN mós aprova proposta númeru 4 ne’ebé aprezenta hosi Deputadu proponente na’in-tolu ne’e hosi bankada Governu hodi aumenta adisionál rihun $200,00 destina ba Ministériu Agrikultura no Peska (MAP) hodi bele realiza programa investimentu ai-parapa ka mangrove proteje ambiente iha área tasi ibun sira iha Timor-Leste.

Jornalista : Nelson de Sousa

Editór       : Cancio Ximenes

 

iklan
iklan

Leave a Reply

iklan
error: Content is protected !!