Autoridade lókal munisípiu Baucau partisipa sosializasaun BTL.ep kona-ba sistema melloramentu bee-moos iha salaun São José Dioseze Baucau, trsa (10/05). Imajen Tatoli/Natalino Belo.

BAUCAU, 10 maiu 2022 (TATOLI) – Bee Timor-Leste, empreza públika (BTL.ep) tersa ne’e, sosializa sistema melloramentu bee-moos ba ema hotu iha munisípiu Baucau.

BTL.ep hala’o atividade refere hodi sosializa dekretu -lei númeru 4/2004 kona-ba rejime distribuisaun bee-moos ba ema hotu, diploma ministeriál númeru 1/2009 kona-ba fiskalizasaun sistema serbisu kanalizasaun bee-moos no tabela tarifaria.

Diretór Operasaun Manutensaun BTL, Empreza Públika, João de Piedade, hateten, objetivu importante hosi sosializasaun iha munisípiu Baucau atu habelar informasaun  ba konsumidór sira-ne’ebé asesu ona sistema BTL nian maibé nafatin estraga sistema hanesan koneksaun ilegál, fura kanu transmisaun la tuir padraun.

“Ita nafatin aprosima no esplika di’ak liután ba sira nune’e ba futuru bele mellora kanalizasaun nune’e futuru iha sustentabilidade bee-moos iha Baucau tanba objetivu mak ema hotu tenke asesu ba bee-moos,” Diretór Operasaun Manutensaun BTL,ep hateten iha Vila Antiga, tersa ne’e.

Daudaun ne’e, BTL,ep halo melloramentu sistema transmisaun hosi bee-matan ba rezervatóriu no sistema kanalizasaun distribusaun bee-moos ba komunidade hotu atubele iha direitu ba konsume bee-mos.

“Ita prefere pontu rua importante hanesan direitu no devér katak kliente nia direitu mak saida no devér hosi BTL, ami hala’o devér ba sira no sira kumpri sira-nia direitu no devér,” João de Piedade akresenta.

BTL.ep sei prepara kondisaun hanesan melloramentu sistema transmisaun,  melloramemntu sistema distribusaun ne’ebé durante ne’e komunidade halo koneksaun no hakotu ligasaun ilegál no bandu kliente utiliza makina bomba bee.

Nune’e tuir planu, kada kliente sei selu ho volume bee-mos hamutuk 14 mill litru sei kumpri dever sentavu 0,15 tuir kategória hanesan konsumedór sosiál, emprezáriu no seluk tan.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here