BOBONARO, 09 maiu 2022 (TATOLI) – Progresu reabilitasaun sede suku Oe-leu, postu administrativu Bobonaro, munisípiu Bobonaro, atinje ona 45%.
Xefe suku Oe-leu, Januário Bragança, informa implentasaun projetu reabilitasaun sede suku Oe-leu nian atinje ona 45%.
Nia haktuir, loloos ne’e projetu ne’e atinje ona 75% tanba molok hahú serbisu badaen sira promete sei konklui projetu ne’e ho durasaun fulan ida, maibé tanba orientasaun hosi Programa Nasionál Dezenvolvimentu Suku (PNDS) orienta kompañia fornesedor distribui materiál fabrikadu atrazu no tékniku fasilitadór serbisu ladún másimu nune’e prezudika badaen sira aselera serbisu.
“Agora nia progresu tama ona 45% tanba iha ona faze monta besi, aban hanesan badaen sira komesa monta ona kalen, depois foru, monta keramik fulan ida-ne’e bele finaliza ona,” nia informa ba jornalista Tatoli, iha Oe-eleu, domingu ne’e.
Líder komunitária ne’e lori komunidade aldeia rua nia naran agradese ba VIII Governu Konstituisionál liuhosi Ministériu Administrasaun Estatál (MAE) ne’ebé iha tinan ne’e prioritiza ona reablita no moderniza sede suku ne’e hosi ninia orijinalidade.
“Ita-nia governu oferese tán komputadór no ekipamentu suku, maske balun ladún kompletu maibé bele fasilita ona ami-nia serbisu, ita espera obra ida-ne’e finaliza lalais atu ami bele halo atendimentu ba komunidade sira iha fatin ne’ebé di’ak,” nia katak.
Totál orsamentu ne’e autoridade munisípiu Bobonaro prevee iha tinan fiskál 2022 ba reabilitasaun obra ne’e Programa Nasionál Dezembolvimentu Suku (PNDS) munisípiu Bobonaro hamutuk $12,000,00. Montante ne’e gasta ba reablitasaun no selu badaen sira.
Entretantu suku Oe-leu iha aldeia rua mak hanesan, Mologen no Oe-leu Taz ho totál populasaun 1,980 no uma-kain 379.
Jornalista : Sérgio da Cruz
Editór : Evaristo Soares Martins
