Jogadór Timor-Leste faru mean ho jogadór Myanmar halai hadau malu hela bola. Imajen twiter @AFFPresse

VIETNAME, 08 maiu 2022 (TATOLI)— Ekipa selesaun nasionál Timor-Leste U-23, dominggu ne’e, la konsege rekolla pontu iha jogu SEA Games, daruak ne’ebé hala’o iha Estádiu Nasionál Vietname tanba derrota ho Myanmar 2-3.

Ho derrota ne’ebé ekipa Lafaek hetan fó ameasa boot atu ultrapasa ba jogu tuir mai tanba lakon dala rua tutuir malu ona, ho nune’e iha grupu A lidera provizóriu hosi Vietname ho pontu tolu, Filipina pontu tolu, Myanmar pontu tolu, Indonézia no Timor-Leste okupa zona mean ho pontu zero.

Notísia relevante: Jogadór na’in-neen pozitivu COVID-19, TL derrota kontra Filipina 0-4

Daudaun ne’e Timor-Leste hela de’it ona jogu rua, mak hanesan iha tersa (10/05) sei kontra Indonézia no sábadu (15/05) kontra Vietname, iha jogu rua ne’e Timor-Leste manán sei iha oportunidade mihis tanba sei haree mós ba jogu hosi ekipa seluk nian.

Timor-Leste lakon ho Myanmar tanba jogu entre ekipa rua ne’e hala’o ho ritmu ne’ebé makas, maibé Myanmar halo jogu ne’ebé ho intensidade makas atu hatama golu lais. Enkuantu Timor – Leste hala’o jogu badak ho modelu pasa hosi ain ba ain ho kalma no la ansi hatama golu bainhira seidauk kona iha alvu.

Komisaun Organizadora ba eventu SEA Games simu Jogadór selesaun nasionál U-23 Timor-Leste, bainhira hosi Malázia too iha aeroportu Vietname. Imajen/espesiál

Ho presaun hirak ne’ebé Myanmar halo hamonu duni espiritu Timor-Leste nian ladun konsentrasaun ho di’ak ba jogu iha minutu 31, jogadór Myanmar Win Naing konsege marka golu ida hodi muda rezultadu ba 0-1.

Golu ne’e halo jogadór timór-oan sira nia rítmu jogu tuun ba bebeik, nune’e iha minutu 37 jogadór Myanmar Naing Tun les tan golu ida hodi hatur rezultadu ba 0-2.

Golu ne’e mak hanesan golu ikus iha minutu parte dahuluk no laiha tan golu ruma mak akontese no Myanmar provizóriu lidera jogu ho eskore 0-2.

Dolar ba segunda parte treinadór Fabio Maciel da Silva tenta halo mudansa ba jogadór hodi dada sai Elias Mesquita, hodi subtitui fali Mozinho Barreto de Lima, troka mós Filomeno Junior hodi troka Gumario Morreira no dada sai mós Yohanes Gusmão hodi hatama fali Orcelio too ikus jogu sai oin-seluk.

Notísia relevante: Jogadór na’in-tolu rekupera ona hosi COVID-19 iha Malázia

Sira komesa halo jogu moris no Myanmar dada is la hetan, nune’e iha minutu 67 defeza Myanmar nian halo falta hasoru jogadór Timor-Leste, Mozinho de Lima, nune’e árbitru fó kedan falta, bola falta ne’e ezekuta duni hosi Mozinho ikus fura duni rede Myanmar nian hodi nakfilak rezultadu ba 1-2.

Jogu la’o manas liutan, treinadór Fabio la nonok de’it halai ba mai iha kampu ninin hodi orienta nafatin jogadór sira atu halo empata jogu ne’e.

Orientasaun hirak ne’e la hela de’it hanesan orientasaun tanba jogadór sira hatudu duni prova, nune’e iha minutu 72, jogadór Armindo Barbosa konsege les golu ida bainhira aproveita bola barullu iha liña Myanmar nia oin hatur kedan rezultadu ba 2-2.

Jogu naruk hetok no manas liután tanba Myanmar luta ne’ebé makas loos. Ikus mai luta ne’ebé Myanmar halo la hela de’it hanesan luta tanba iha minutu 90+4, jogadór Win Naing fura tan rede Timor-Leste hodi muda kedan rezultadu ba 2-3.

Ikus mai jogu ramata Myanmar mak iha direitu absolutamente rekolla pontu tolu hodi haksoit sai hosi zona mean ba tuur iha jona normál.

Notísia relevante: COVID-19 afeta ba selesaun nasionál U-23 iha jogu SEA Games

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here