iklan

MUNISÍPIU, VIQUEQUE

Ponte Beaço kotu difikulta movimentu transpote públiku

Ponte Beaço kotu difikulta movimentu transpote públiku

Komunidade Uatulari ho Uatucarbau, munisipiu Viqueque uza dalan alternativa tanba ponte Beaco kotu.Imajen/espesial

DILI, 07 Maiu 2022 (TATOLI)- Ponte Beaço diresaun Viqueque Vila liga ba postu adiministrativu Uatulari ho Uatucarbau kotu hodi difikulta transporte públiku iha tempu udan.

“Ponte Beaço kotu kuaze tinan hitu resin ona. Nune’e difikulta tebes ba transporte públiku liuliu komunidade nian viajen ba postu Uatulari no Uatucarbau. Maibé ita laiha orsamentu hodi halo normalizasaun ba ponte ne’ebé kotu dadaun ne’e,” Diretór Serbisu Ministériu Obra Públiku (MOP), munisípiu Viqueque, Mario do Rego, hateten ba jornalista Agência Tatoli, via telefónika, sábadu ne’e.

Diretór MOP ne’e hateten, ponte Beaço foin lalais halo survei too postu Uatucarbau ona, maibé atu halo manutensaun ba ponte ne’e laiha orsamentu.

“Atu hadia ponte ne’e, maibé ninia orsamentu maka laiha, tanba ne’e sai difikulta ba ita halo normalizasaun ba ponte Beaço. Ita laiha meiu ida hodi solisiona ba ponte tanba orsamentu aloka mai ba ponte laiha. Nune’e meiu ida mak ita halo koordenasaun ho diresaun nasionál MOP tanba desizaun ne’e iha sira, ita munisípiu labele halo buat ida,” nia afirma.

Molok ne’e,  governu fó ba kompañia lokál rua iha Viqueque mak atu halo rekuperasaun, maibé kompañia rua ne’e hadau malu to’o agora ponte Beaço la hadi’a.

Diretór ne’e dehan atu hadi’a ponte Beaço presiza orsamentu $60.000.  Maibé diresaun nasionál maka bele halo koordenasaun ho kompañia sira hodi bele hadia ponte Beaço.

“Ita rekoñese duni katak ponte ne’e difikulta ba ema hodi halo movimentu liuliu iha tempu udan ne’e kuandu komunidade halo viajen ho kareta no motór labele liu,” nia afirma.

Jornalista: Vitorino Lopes da Costa

Editóra   : Florençio  Miranda Ximenes

iklan
iklan

Leave a Reply

iklan
error: Content is protected !!